АҚШ ва “Толибон” ҳаракати вакиллари Қатар пойтахти Доҳада икки кунлик музокаралар учун йиғилди. 1 август, душанба куни йиғилишнинг биринчи раунди якунланганидан кейин АҚШ Давлат департаменти Вашингтон “Толибон” билан иқтисодий барқарорлик ва гиёҳванд моддалар савдосига қарши кураш бўйича кейинги техник музокараларга очиқлигини маълум қилди.
Давлат департаменти Афғонистондаги молиявий аҳвол яхшилангани, жумладан, инфляция даражаси пасайгани, шунингдек, 2022 йилда киритилган тақиқ доирасида кўкнори етиштириш камайганини юқори баҳолади ҳамда гиёҳвандликка қарши курашда ҳамкорликни давом эттиришга тайёрлигини билдирди.
Шу билан бирга, Қўшма Штатлар Афғонистонда инсон ҳуқуқлари билан боғлиқ вазият ёмонлашаётганидан хавотир билдирди. АҚШ расмийлари “Толибон”ни қизларнинг ўрта таълимни олишига қўйилган тақиқни бекор қилиш, аёлларнинг ишлашига рухсат бериш ва ҳибсга олинган америкаликларни озод қилишга чақирди.
“Толибон” нимани талаб қилмоқда?
“Толибон” ўз навбатида, ҳаракат етакчиларига қўйилган санкцияларни олиб ташлаш ва Афғонистон Марказий банкининг хорижий активларини қайтаришга чақирди.
“Афғонистон Ислом Амирлиги яна бир бор таъкидлайди: ‘Толибон’ етакчиларининг сафарларига қўйилган тақиқнинг бекор қилиниши ва Марказий банк захираларининг қайтарилиши афғонларнинг ўз иқтисодиётини ташқи ёрдамсиз ривожлантира олишига бўлган ишончни мустаҳкамлаш учун муҳим”, — дейди Афғонистон Ташқи ишлар вазирлиги вакили.
“Толибон” етакчиларининг аксарияти хорижий сафарлар учун Бирлашган Миллатлар Ташкилотидан рухсатнома олиши керак. Афғонистоннинг банк сектори “Толибон” ҳокимиятга қайтганидан сўнг санкциялар туфайли фалажланди, Афғонистон Марказий банкининг 7 миллиард доллар миқдоридаги хорижий активлари Нью-Йоркдаги Федерал захира банкида музлатиб қўйилган. Ҳозир бу маблағларнинг ярми Швейцариядаги Афғонистон жамғармасида сақланади.
Изоҳ (0)