“ПСЖ” ҳужумчиси Килиан Мбаппенинг трансфери “Реал”га молиявий томондан катта даромад келтириши кутилмоқда.
Франциялик футболчи билан тузиладиган олти йиллик шартнома Мадрид жамоасига 1 миллиард еврога яқин даромад келтириши тахмин қилинмоқда. Бу ҳақда El Debate хабар қилмоқда.
Мбаппенинг “Реал”га ўтиши клуб учун нафақат ўйин томондан, балки молиявий тарафдан ҳам улкан фойда келтиради. Мбаппе номидаги барча маҳсулотлар сотуви янги рекордлар ўрнатади.
“Реал” билан ҳамкорлик қилаётган барча хомийлар ўз таклифларини яхшилашига тўғри келади, чунки бозордаги нархни кўтариб юборадиган янги рақобатчилар пайдо бўлади. Шунингдек, янгиланган “Сантьяго Бернабеу”га келадиган хомийларни ҳам унутмаслик керак.
Дастлабки ҳисоб-китоблар Мбаппенинг “Реал”га ўтиши клубга 1 миллиард евро даромад олиб келишини кўрсатмоқда. Бу рақам жамоа Килиан билан ютадиган совринлар ҳисобига яна кўтарилиши мумкин, — дейилади манбада.
Қайд этилишича, испан клуби 24 ёшли футболчи билан шахсий шартнома борасида келишиб қўйган. Унга кўра, Килиан “Реал”га ўтадиган бўлса йилига 54 миллион евро маош олади.
Аввалроқ Мбаппе “ПСЖ” билан шартнома узайтирмаса ёки шу ёзда жамоани тарк этмаса клуб уни мавсум давомида майдонга туширмаслиги ҳақида хабарлар янграганди. Мбаппенинг “ПСЖ” билан амалдаги шартномаси 2024 йил ёзида якунланади.
Изоҳ (0)