Биргина 2022 йилда Россияда 21 мингдан ортиқ одам урушга қарши позицияси учун жазоланди. Бу ҳақда Amnesty International халқаро инсон ҳуқуқлари ташкилотининг 20 июль куни чоп этилган янги ҳисоботида айтилади.
“Россияда норози фикрлиларни бостириш кенг тус олган. Бир қатор чора-тадбирлар Россия урушига қарши танқидий овозларни ўчиришга қаратилган”, — дейди ҳуқуқ ҳимоячилари.
Ҳисоботда Россия ҳукумати Украинага қарши урушни қоралаганларни қандай жазолаши таҳлил қилинган, шунингдек, Россияда урушга қарши ҳаракатни бостириш учун қўлланадиган қонунлар ва амалиётлар кўриб чиқилган.
“Ушбу тизимдаги ўта адолатсиз жараёнлар қамоқ ва катта жарималарга олиб келади”, — деди Amnesty International ташкилотининг Германиядаги бош котиби вазифасини бажарувчи Юлия Духров.
Ташкилот маълумотларига кўра, Россияда урушга қарши позицияси учун таъқибга учраганларнинг аксарияти жаримага тортилган, улардан 2 307 нафари ҳибсга олинган. Тадқиқотда айтилишича, 150 дан ортиқ одам “армия ҳақидаги фейклар” ва Россия Қуролли кучларини “такрор обрўсизлантириш” ҳақидаги моддалар бўйича жавобгарликка тортилган. Россияда қабул қилинган репрессив қонунлар муаллифлар томонидан “абсурд” деб аталди.
Бундан ташқари, Amnesty россияликлар лагерларга ҳукм қилинган ҳолатларни ҳужжатлаштирди, ташкилот уларни сиёсий маҳбуслар деб ҳисобламоқда. Ҳуқуқ фаоллари Россия ҳукуматини урушга қарши позицияси учун ҳибсга олинганларнинг барчасини озод қилишга ва репрессив қонунларни бекор қилишга чақирди.
Изоҳ (0)