Россия президенти матбуот котиби Дмитрий Песков Одессадаги порт инфратузилмаси объектларига тунги ҳужум Қрим кўприги учун жавоб зарбалари эканини айтди. Бу ҳақда “Газета.ру” хабар берди.
18 июлга ўтар кечаси Украина ҳарбийлари Одесса осмонида Россиянинг 6 та “Калибр” ракетасини, шунингдек, Одесса ва Николаев вилоятларида 25 та Shahed камикадзе дронларини уриб туширганди.
Песков ўз баёнотида учувчисиз катерлар ёрдамида Россияга “қарши ҳужум учун тайёрланаётган объектларга” ва Одессада ушбу катерлар ишлаб чиқарилган жойларга зарба берилганини айтди. Шунингдек, Николаев ва Одесса вилоятларида 70 минг тоннага яқин ёқилғи сақланган омборлар вайрон бўлгани таъкидланмоқда.
Одесса вилояти маъмурияти раҳбари Олег Кипернинг айтишича, Одессада уриб туширилган ракеталарнинг бўлаклари порт инфратузилмаси объектлари ва бир нечта хусусий уйларга зарар етказган. Улардан бирида тинч фуқаро жароҳатланган.
Украина президенти офиси раҳбари Андрей Ермак Россиянинг Украина жанубий вилоятларига ҳужумини Украина донини экспорт қилишига халал беришга уриниш деб баҳолади.
“Россиянинг Одесса ва Николаевга ракеталар ва дронлар ёрдамида амалга оширган тунги ҳужуми террорчи мамлакатнинг Украина озиқ-овқат экспортига қарам бўлган турли мамлакатлардаги 400 миллион кишининг ҳаётини хавф остига қўймоқчи эканига яна бир далилидир”, — деди у ўзининг Telegram-каналида.
Қрим кўпригида портлаш
17 июль тонгда Қрим кўпригида портлаш содир бўлди, оқибатда йўлнинг бир қисми сувга тушиб кетди. Портлаш оқибатида икки нафар россиялик ҳалок бўлган.
Баъзи ОАВ манбаларга таяниб, бу Украина хавфсизлик хизмати (УХХ) ва Украина ҳарбий-денгиз кучлари томонидан амалга оширилган махсус операция бўлганини хабар қилди, бироқ УХХ кўприкдаги ушбу ҳужум тафсилотларига аниқлик киритмади.
Кремль муносабати
Россия президентининг матбуот котиби Дмитрий Песков Россиянинг барча тегишли хизматлари ва идоралари Қрим кўпригидаги портлашдан сўнг эҳтимолий янги ҳужумларга тайёр эканини айтди. У “махсус ҳарбий операция”нинг мақсадлари орасида Қрим кўпригидаги портлашга жавоб ҳам бўлишини таъкидлади.
“Биз бу теракт сабаблари ва унинг ортида кимлар турганини биламиз. Бу биздан янада совуққонлик, қўшимча чора-тадбирлар ва қўшимча меҳнат талаб қилади”, — деди Песков.
Путин муносабати
Россия президенти воқеани “Киев режимининг террорчилик ҳаракати” ва “маъносиз жиноят” деб атади ва Қрим кўпригидан ҳарбий транспорт учун “узоқ вақтдан бери фойдаланилмаётганини” қўшимча қилди.
“Албатта, Россиядан жавоб бўлади. Мудофаа вазирлиги тегишли таклифларни тайёрламоқда”, — деди Путин.
Изоҳ (0)