Россия дон битимидан чиққанидан кейин Украинадан қишлоқ хўжалиги маҳсулотларини экспорт қилишнинг “ягона варианти” қуруқлик йўли бўлиб қолмоқда, деди АҚШ Миллий хавфсизлик кенгаши матбуот котиби Жон Кирби брифингда.
Кирбининг сўзларига кўра, Украина ғалласини қуруқлик орқали экспорт қилиш денгизга қараганда самарасизроқ бўлади, аммо АҚШ юк кемаларини ҳарбий кемалар билан кузатиб бориш вариантини кўриб чиқмаяпти.
“Мавжуд ягона вариант — уни қуруқлик, темирйўл ёки юк машинасида ташиш. Албатта, ҳозир ҳамма нарса Украинада қуруқлик орқали ташиляпти. Бу қийинроқ ва унчалик самарали эмас”, — деди Кирби.
У келишувнинг бузилишида Россияни айблаб, Москва қарори туфайли дунё бўйлаб дон нархи ошиши мумкинлигини таъкидлади.
Россия ва Беларусдан ташқари, Украина Польша, Словакия, Венгрия, Молдова ва Руминия билан чегарадош. Май ойи бошида Еврокомиссия маҳаллий фермерларнинг йўқотишлари сабаб Украина қишлоқ хўжалиги маҳсулотларини ушбу мамлакатларга етказиб беришни тақиқлаган эди. Чеклов чоралари 15 сентябргача амал қилади. Қишлоқ хўжалиги маҳсулотларини ушбу мамлакатлар орқали транзит қилиш учун тақиқ йўқ.
Россия дон битимидан чиқди
17 июль куни Россия Қора денгиз портларидан Украина озиқ-овқат маҳсулотларини экспорт қилишга рухсат берувчи дон битимидан расман чиқди. У бу ҳақда Туркия, Украина ва БМТ котибиятини хабардор қилган. Россия юк ташиш хавфсизлиги кафолатларини ҳам бекор қилди ва Қора денгиз шимоли-ғарбий қисмидаги гуманитар коридорни чекламоқчи.
Украина президенти Владимир Зеленский Бирлашган Миллатлар Ташкилоти бош котиби Антониу Гутерришга қўнғироқ қилиб, у билан Россиянинг дон битимидан чиқиши масаласини муҳокама қилди. Унга кўра, келишувнинг барбод бўлиши туфайли “Украинанинг озиқ-овқат экспортига қарам бўлган Сомали, Эфиопия, Жанубий Судан ва Яманда 400 миллион киши очликдан ўлиш хавфи остида”.
Бундан ташқари, Зеленский Гутерриш ва Туркия президенти Ражаб Тоййиб Эрдўғонга расмий мактублар жўнатганини, уларга ғалла бўйича битим ишларини Россиянинг иштирокисиз давом эттиришни таклиф қилганини айтди.
Изоҳ (0)