Сурхондарёда қарздор корхонанинг 3 та махсус машинаси сотувга чиқарилди

Сурхондарё вилояти Олтинсой туманида қарздор корхонанинг 3 та махсус машинаси сотувга чиқарилди. Бу ҳақда МИБ ахборот хизмати “Дарё”га хабар берди.

Унга кўра, Олтинсой туман “Йўллардан фойдаланиш” унитар корхонаси туманда белгиланган бир қанча лойиҳаларни амалга ошириш учун хўжалик юритувчи субъектлар, хусусан, қурилиш фаолияти билан шуғулланувчи тадбиркорлар билан ўзаро шартномалар асосида бажарилган ишларни қабул қилиб олган бўлса-да, кўрсатилган хизматлар учун тўловлар тўлиқ амалга оширилмайди. Ушбу масала судларда кўриб чиқилиб, тадбиркорлар фойдасига жами 1 миллиард 536 миллион сўм қарздорлик ундирилиши белгиланди.

Мазкур ижро ҳужжати Мажбурий ижро бюроси Олтинсой туман бўлими иш юритувига қабул қилиниб, ижро ҳаракатларига киришилди. Қарздор унитар корхонанинг барча ҳисоб рақамларига банд солиниб, мол-мулклари кўздан кечирилди. Мажбурий ижро ҳаракатлари давомида қарздор корхонага тегишли бўлган Isuzu русумли автобус аукцион савдоларида 255 миллион сўмга сотилиб, қарздорликларни қоплашга йўналтирилди. 

Шунингдек, 3 та махсус транспорт воситалари хусусан, “ЗИЛ ММЗ” 46 миллион сўм,  Sinotruk Golden Prince юк автотранспорти 383 миллион сўм ва JSB 3DХ Super экскаватор-юклагич махсус техникалари 451 миллион сўм бошланғич нархларда аукцион савдоларига чиқарилди. Аукцион савдоларидан тушган маблағлар тадбиркорларга тенг тақсимлаб берилади.