Қирғизистонда россиялик хонанда Григорий Лепснинг концерти бекор қилинди. Бу ҳақда Akipress хабар берди.
Концерт 2 август куни Чўлпон-Отада бўлиб ўтиши керак эди. Концерт ташкилотчилари тадбир бекор қилинганини маълум қилди.
Бунгача Григорий Лепснинг 8 июль куни Қозоғистонда бўлиб ўтиши режалаштирилган концерти бекор қилинганди. Бунга россиялик қўшиқчининг урушни қўллаб-қувватлаши сабаб бўлган.
Жумладан, Лепс Украина армияси танкини ишдан чиқарган ҳар бир кишига бир миллион рубль тўлашни ваъда берган. 4 июль куни у Украина ҳарбийлари фойдаланаётган немис Леопард танкини йўқ қилган аскарни пул билан мукофотлаган.
Ўз навбатида, ўзбекистонлик кўплаб фаоллар ҳам Григорий Лепснинг Ўзбекистонда бўлиб ўтиши кутилаётган 23-октябрдаги концертига қаршилик билдирмоқда, бироқ ҳозирча тадбир бекор қилингани йўқ.
Ўзбекистон маданият ва туризм вазири ўринбосари Баҳодир Аҳмедов кремлпараст қўшиқчиларга Ўзбекистонда концерт бериши ёки аксинча чеклов қўйилиши бўйича изоҳ берганди. У Ўзбекистонда санъатга тўсиқнинг ўзи йўқлиги, концертлардан тушган маблағлар урушга йўналтирилиши ҳақидаги гаплар ҳақиқатдан йироқлигини айтганди.
Изоҳ (0)