Афғонистон 2022 йилда жаҳондаги афюннинг 80 фоизини етиштирган. Бу ҳақда Бирлашган Миллатлар Ташкилотининг Наркотиклар ва жиноятчиликка қарши кураш бошқармаси (UNODC) янги ҳисоботида айтилади.
.jpg)
Аммо 2021 йил августидан буён Афғонистонда ҳокимиятни назорат қилиб келаётган “Толибон” расмий вакили Забиҳулла Мужоҳид мамлакатда кўкнори етиштирилмаслигини айтди.
“Мана икки йилдан бери кўкнори етиштириш тақиқланган. Ишончим комилки, бизда унинг бир фоизи ҳам ишлаб чиқарилмаган, агар шундай бўлса ҳам, у йўқ қилинган. Бу 2023 йилда Афғонистонни кўкноридан бутунлай тозалаганимизни англатади. (Дунё бўйлаб афюн етиштириш ҳақидаги) баёнот ҳақиқатга тўғри келмайди”, — деди у.
UNODC томонидан эълон қилинган алоҳида ҳисоботда айтилишича, Афғонистонда 3,5 миллионга яқин одам гиёҳванд моддалар истеъмол қилади, бу умумий аҳолининг қарийб 10 фоизини ташкил этади.
Эслатиб ўтамиз, БМТ Наркотиклар ва жиноятчиликка қарши кураш бошқармасининг ноябрь ойидаги ҳисоботида Афғонистонда кўкнори етиштириш аввалги йилга нисбатан 32 фоизга ошиб, 233 минг гектарни ташкил қилгани ҳақида айтилганди.
Асосий экин майдонлари — 73 фоизи Афғонистоннинг жануби-ғарбий вилоятларига тўғри келади — у ерда ҳам ҳосилдорликнинг энг катта ўсиши кузатилган. БМТ ҳисоботига кўра, Ҳилманд вилоятида экин майдонларининг бешдан бир қисми кўкнорига ажратилган.
Изоҳ (0)