Машҳурларнинг Twitter аккаунтларини бузишни ташкил этишда айбдор деб топилган ўсмир беш йилга озодликдан маҳрум этилди.
Британиялик хакер Жозеф O’Коннор 2020 йилда Twitter’да сиёсатчилар ва таниқли шахсларнинг юздан ортиқ саҳифаларини бузиб кирган. У шу йил бошида АҚШ прокуратураси талаби билан Испаниядан экстрадиция қилинди ва шундан бери ҳибсда сақланмоқда.
АҚШ Адлия департаменти прокурорлари O’Коннорни камида етти йил қамоқ жазосини ўташини талаб қилди. Судда хакер ўз жиноятларини “аҳмоқона ва маъносиз” эканлигини айтиб, қурбонларидан кечирим сўради ва судьядан жазони енгиллатишни илтимос қилди.
"O’Коннор ўзининг мураккаб технологик қобилиятларидан ёмон мақсадларда фойдаланган — у катта миқдордаги криптовалюталарни ўғирлаш учун SIM карталарни алмаштириш орқали хакерлик ҳужумини амалга оширган.
Шунингдек, Twitter’ни бузиб кирган, ижтимоий тармоқлардаги аккаунтларни эгаллаб олган ва ҳаттоки икки қурбонни кибер таъқиб қилган. Улар орасида вояга этмаган жабрланувчи ҳам бор”, — дейилади Нью Йорк суди баёнотида.
Ҳукуматнинг таъкидлашича, PlugWalkJoe ники билан танилган O’Коннор ўнлаб Twitter аккаунтларини, жумладан, Apple, Binance, Amazon асосчиси Жефф Безос, Microsoft асосчиси Билл Гейтс, АҚШ президенти Жо Байден ва Tesla компанияси раҳбари Илон Маскнинг аккаунтларини бузиб кирган.
Умуман олганда, хакер 130 та аккаунтни бузган. Уларнинг 45 тасидан фирибгарлик мақсадида фойдаланган. O’Коннор ва унинг шериклари 794 минг доллардан ортиқ пул ўғирлашга муваффақ бўлишди. Энди улар молиявий зарарни қоплаши керак бўлади.
Қайд этилишича, хакер тергов билан келишувга эришган ва барча айбларга иқрор бўлган. O’Коннорга, шунингдек, полиция рухсатисиз компьютерлардан фойдаланиш тақиқланади.
Изоҳ (0)