Ўзбекистонда кескин иссиқ об-ҳаво сабаб поездлар ҳаракати тезлигига чекловлар жорий этилмоқда. Бу ҳақда “Ўзтемирйўлйўловчи” матбуот хизмати хабар берди.
“Ҳарорат кўтарилиши натижасида ер усти темир йўлларининг релслари ҳамда уларнинг пўлат қисмларида ҳарорат жуда юқори бўлади. Шу боис, йўловчилар ва поездлар ҳаракат хавфсизлигини таъминлаш мақсадида, поездлар ҳаракат тезлигига чекловлар ўрнатилади”, — дейилади хабарда.
Қайд этилишича, ҳаракат тезлигига чекловлар ўрнатилган поездлар совитиш тизимининг ишлаш қуввати пасайиши мумкин.
“Ўзтемир йўлйўловчи” АЖ ўз мижозларидан, аномал иссиқлик туфайли юзага келиши мумкин бўлган ноқулайликлар учун узр сўрайди.
Бир неча кун олдин “Ўзтемирйўлйўловчи” йўловчи вагонларни янгилаш ҳамда совитиш тизими билан жиҳозлаш борасида олиб борилаётган ишлар тўғрисида маълумот берганди. Маълум қилинишича, йўловчи вагонларни совитиш тизими билан жиҳозлаш жуда катта сармоя талаб қилинади, совитиш тизими билан жиҳозлаш имконияти мавжуд бўлмаган вагонларни янгисига босқичма-босқич алмаштирилмоқда.
“Ўзгидромет” маълумотларига кўра, 11 июнь, якшанба куни республиканинг жанубий вилоятларида ҳаво ҳарорати 40 даражагача исийди. Қатор ҳудудларда чанг-тўзонлар кузатилиши мумкин.
Изоҳ (0)