Хоразм вилояти Урганч шаҳрида аёлнинг ўлимига сабабчи бўлган автобус ҳайдовчисига ҳукм ўқилди. Бу ҳақда Олий суд ахборот хизмати хабар берди.
Жиноят ишлари бўйича Урганч шаҳар судида 1975 йилда туғилган, ўрта маълумотли, 2 нафар фарзанди бор, МЧЖда ҳайдовчи сифатида ишлаган фуқарога нисбатан жиноят иши кўриб чиқилди. Судда маълум бўлишича, айбланувчи Isuzu русумли автобусни Паҳлавон Маҳмуд кўчаси бўйлаб бошқариб келаётганида йўлни белгиланмаган қисмидан кесиб ўтаётган пиёдани уриб юборган.
ЙТҲ натижасида фуқаро вафот этган. Судланувчи кўрсатмасида айбига тўлиқ иқрор бўлиб, марҳуманинг яқинларидан кечирим сўради. Суд айбдорнинг оилавий аҳволи ва айбига тўлиқ иқрорлигини инобатга олиб ҳукм қилди.
У Жиноят кодексининг 266-моддаси 2-қисмида назарда тутилган жиноятни содир этганликда айбли деб топилиб, 2 йил муддатга транспорт воситаларини бошқариш ҳуқуқидан, шунингдек, 4 йил муддатга озодликдан маҳрум қилинди.
Изоҳ (0)