АҚШ собиқ президенти Дональд Трампга 2022 йил август ойида унинг қароргоҳида топилган махфий ҳужжатларга оид жиноий иш бўйича расман айблов эълон қилинди. Бу ҳақда собиқ президентнинг ўзи маълум қилди.
Трампга қўйилган айблов моддалари ҳақида 13 июнь, сешанба куни маълум бўлади, ўша куни у Майамидаги полицияга расман таслим бўлиши керак. Шундан сўнг сиёсатчига нисбатан эҳтиёт чораси танланади, тергов материаллари эълон қилинади.
New Ёрк Times икки манбага таяниб, айбловда еттита эпизод, жумладан, онт ичиб алдаш ва адолатга тўсқинлик қилувчи фитна уюштириш бўлиши ҳақида ёзмоқда. Терговга махсус тайинланган мустақил прокурор Жек Смит бошчилик қилмоқда.
Ўз баёнотида Трамп айбини тан олмади ва бу кунни АҚШ учун “энг қоронғи кун” деб билишини ёзди. Прокурорлар ва Оқ уй расмийлари айбловлар ошкор этилмагунча Смитнинг қарорига изоҳ бермаслигини айтди.
Бу Трампга нисбатан очилган иккинчи жиноий иш. Апрель ойида у Нью-Йорк штати судьялари томонидан бизнес ёзувларини сохталаштиришда айбланган эди. Бу бўйича суд жараёни 2024 йилнинг март ойида бошланади.
Трамп бўлажак сайловларда Республикачилар партиясидан президентликка номзод бўлиш учун асосий даъвогар ҳисобланади. Агар у бирорта модда бўйича айбдор деб топилиб, қамоққа жўнатилган тақдирда ҳам бу уни АҚШ президентлигига номзод бўлиш ҳуқуқидан маҳрум қилмайди.
Изоҳ (0)