Давлат хавфсизлик хизмати ва Бош прокуратура ҳузуридаги департамент ходимлари ҳамкорлигида ўтказилган тезкор тадбирда Фарғонада ҳаж зиёрати билан боғлиқ фирибгарлик ҳолатига чек қўйилди.
Қайд этилишича, Фарғона шаҳрида фаолият юритувчи туристик фирма ходими Марғилон шаҳрида яшовчи, 36 ёшли фуқаро ва унинг ўғлини 20 минг АҚШ доллари эвазига ҳаж зиёратига юборишни ваъда қилиб, талаб қилинган суммадан 10 минг долларни олган вақтида ашёвий далиллар билан ушланган.
Тезкор суриштирув ҳаракатлари давомида, у ушбу пул маблағини туристик фирма раҳбарининг кўрсатмаси асосида олгани маълум бўлган.
Ҳозирда ҳолат юзасидан мазкур шахсларга нисбатан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари олиб борилмоқда.
“Ҳурматли фуқаролар муқаддас ҳаж сафарига боришда фирибгарларнинг тузоғига тушиб, алданиб қолманг. Огоҳ бўлинг”, — дейилади хабарда.
Бундан олдин Марғилон шаҳрида фаолият юритувчи туристик фирма раҳбари Я.М. ўзганинг ишончига кириб, уни ва танишини ҳаж зиёратига юбориш эвазига 16 минг доллар олган вақтида ашёвий далиллар билан ушланганди.
Дин ишлари бўйича қўмита ҳаж сафарига юбораётган фирмалардан эҳтиёт бўлишга чақирганди. “Ўзбекистон учун ажратилган ҳаж квотаси фақатгина Дин ишлари бўйича қўмита ва Ўзбекистон мусулмонлари идораси томонидан ташкил этиладиган ҳаж сафарига отланган зиёратчиларга ажратилган, шундай экан, айримларнинг Ўзбекистон орқали ҳаж сафарига жўнатамиз, деган алдовларига учманг”, — дея огоҳлантирганди қўмита.
Изоҳ (0)