“Укргидроэнерго” раҳбари Игор Сиротанинг айтишича, Каховка ГЭС ўрнида янги станция қуриш камида беш йил вақт олади ва камида бир миллиард гривна(27 миллион доллар)га тушади. Унинг баёнотини ГЭС штаб-квартираси матбуот хизмати чоп этди.
“Янги станция қуриш учун 24/7 режимида ишлаганда камида 5 йил керак. Вайронагарчиликнинг тўлиқ кўламини ҳалигача билмаймиз: нафақат станция, балки ўтиш жойлари, сув таъминоти, газ таъминоти ҳам зарар кўрган. Бу мураккаб гидроэлектр мажмуаси, уни яхшилаш вақт талаб этади”, — деди Сирота.
Унинг сўзларига кўра, қурилиш уруш тугаганидан кейин бошланиши мумкин, ҳозир бўлса бузилган тўғонни қайта беркитиб, аҳоли, қишлоқ хўжалиги ва саноатни сув билан таъминлаш зарур.
Сиротанинг қўшимча қилишича, “Укргидроэнерго” ходимлари оккупациядан кейин Каховка сув омборини имкон қадар тезроқ тўлдириш учун сув омборларининг юқори қисмига сув ғамлайди.
6 июнь куни эрталаб Каховка ГЭСнинг тўғони бузилди. Россия бунга Украинанинг ўққа тутишлари сабаб бўлганини даъво қилмоқда. Киев Россия ҳарбийлари тўғонни портлатганини айтмоқда. Бундан ташқари, Каховка сув омборидаги аввалги вайронагарчиликлар ва сув сатҳининг кўтарилиши туфайли тўғон ўз-ўзидан қулаган бўлиши мумкинлиги ҳақида тахминлар бор. ГЭС жойлашган оккупациядаги Новая Каховка шаҳрининг Россия томонидан тайинланган “мери” Владимир Леонтев соҳилбўйи ҳудудларини сув босиши оқибатида Херсоннинг беш фуқароси ҳалок бўлганини айтди.
Изоҳ (0)