Ўзбекистон президентлигига кўрсатилган номзодлар рўйхатга олинди

Марказий сайлов комиссиясининг 5 июнь куни ўтказилган навбатдаги мажлисида Ўзбекистон президентлигига кўрсатилган номзодлар рўйхатга олинди, деб хабар беради ЎзА.

Мажлисда:

• Халқ демократик партиясидан Улуғбек Иноятовни,
• Тадбиркорлар ва ишбилармонлар ҳаракати – Ўзбекистон либерал-демократик партиясидан Шавкат Мирзиёевни,
• Ўзбекистон “Адолат” социал-демократик партиясидан Робахон Махмудовани,
• Ўзбекистон Экологик партиясидан Абдушукур Хамзаевни, Ўзбекистон президентлигига номзод этиб рўйхатга олиш тўғрисидаги қарор қабул қилинган.

Шунингдек, Марказий сайлов комиссиясининг мажлисида Ўзбекистон президентлигига номзодларнинг сайловолди ташвиқотини ўтказиш масаласи муҳокама этилди. Муҳокама якунида президентликка номзодларнинг сайловолди ташвиқоти 2023 йил 7 июндан бошланиши қайд этилиб, қарор қабул қилинган.

Ўзбекистонда муддатидан илгари президент сайлови ўтказилади. Бу ҳақда Шавкат Мирзиёев 8 май куни референдум якунларига бағишланган учрашувда маълум қилганди. Ўзбекистонда 2023 йил 9 июль куни муддатидан олдин президентлик сайлови ўтказилиши белгиланган.

Муддатидан илгари Ўзбекистон президенти сайлови

“Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун 6 май куни президент томонидан имзоланди. Сайлов кодексига киритилган ўзгартиришларга кўра президент муддатидан илгари Ўзбекистон президенти сайловини тайинлаган тақдирда, сайлов ушбу кодексга тўлиқ мувофиқ ҳолда 2 ой ичида ўтказилади. Бунда сайловга тайёргарлик кўриш ҳамда уни ўтказишга доир тадбирларни амалга ошириш муддатлари Марказий сайлов комиссияси томонидан белгиланади.