Тошкент шаҳри Чилонзор туманида 21 ёшли йигит терговдан қочиш мақсадида ҳожатхонадан пастга сакраб, вафот этгани хабар қилинганди. Шаҳар ИИББ томонидан воқеанинг тўлиқ тафсилотлари очиқланди. 

ИИББ томонидан эълон қилинган видеода гувоҳлар, йигитни қабул қилиб олган шифокор фиклари ҳам келтирилган. Марҳум билан биргаликда бошқармага тергов учун олиб келинган йигитнинг сўзларига кўра, уларга ҳеч қандай босим бўлмаган. Адвокат ёллаш ҳуқуқи ҳам берилган. 

“Ўнг чўнтагида қора пакетда нарса чиқди. Ҳайдовчи бўлганим сабабли бошқармага бирга келдим. У ҳам менинг танишим эди. Бошқармада шу моддани топиб олганини, чекишини айтди. Мен овқат олиб келиб, қайтиб кетдим. Эртаси куни телефон қилдим. Мендан овқат олиб келишимни сўради. Тезкор ходимлар мени чақиришди. Куч ишлатиш, уриш каби ҳолатлар бўлмади. Икки кун ўша ерда бўлган бўлсам, ҳеч қандай ёмон ҳолатлар бўлмади. Ичкарида сўроқ қилинаётган вақтим бақир-чақир бўлиб кетди. Ҳафизуллоҳ ўзини ташлаган экан”, — дейди воқеа гувоҳи. 

Туман ИИО ФМБ ходимлари Ҳафизуллоҳга зудлик билан тез тиббий ёрдам кўрсатилишини таъминлаш мақсадида шифохонага олиб борилган. Унга бош мия ёпиқ жароҳати, бош мия ёпиқ лат ейиши, бош суягининг синиши, тана аъзоларининг гематомаси ташхиси қўйилган. 29 май куни у касалхонада вафот этган. 

Қайд этилишича, ижтимоий тармоқларда марҳум ички ишлар ходимлари томонидан калтакланиши оқибатида вафот этган, деган фикрлар ҳақиқатдан йироқ.