АҚШ собиқ президенти Дональд Трамп президентлик даврида россиялик ҳамкасби Владимир Путин билан ядро қуролига чек қўйиш устида ишлаган. Бу ҳақда у Fox News телеканалига берган интервьюсида гапириб берди.
“Мен Путин билан ядровий қуролдан қутулишни бошлаш устида ишлагандим”, — деди Трамп.
Унинг фикрича, ядровий уруш бошланиши эҳтимоли туфайли Қўшма Штатлар ҳозир “мамлакат тарихидаги энг хавфли даврда” яшамоқда.
2019 йилда Fox News телеканалига берган бошқа интервьюсида АҚШнинг ўша пайтдаги президенти Трамп ядровий қуролдан халос бўлишни хоҳлашини айтганди. У Россия ва Хитой расмийлари ҳам шундай қилиши кераклигини таъкидлаган.
Бунгача Америка етакчиси маъмуриятидаги манбалар The Washington Post ва CNN телеканалларига Трамп Оқ уй расмийларига Россия ва Хитой билан ядровий қуролларни назорат қилиш бўйича бўлажак уч томонлама келишувга замин тайёрлашни топширганини айтган. Бундан ташқари, CNN АҚШ маъмурияти Москва ва Вашингтон ўртасидаги стратегик ҳужум қуролларини янада қисқартириш ва чеклаш чора-тадбирлари тўғрисидаги келишувнинг ўрнини босадиган келишувни ишлаб чиқаётгани ҳақида ёзган.
Февраль ойи охирида Россия ядро қуролларини қисқартириш бўйича келишувдаги иштирокини тўхтатди. Путиннинг тушунтиришича, Москвага келишув доирасида тўлиқ текширув ўтказишга рухсат берилмаган, шубҳали объектларни текшириш бўйича аризалар жавобсиз қолган ёки расмий сабабларга кўра рад этилган.