“Экология ва атроф-муҳитни муҳофаза қилиш соҳасини трансформация қилиш ва ваколатли давлат органи фаолиятини ташкил этиш чора-тадбирлари тўғрисида”ги президент фармони қабул қилинди. Бу ҳақда Telegramъдаги “Ҳуқуқий ахборот” канали хабар берди.

Фармон билан 2023 йил 1 июлдан “Жамоатчилик экология назоратчиси” тизими жорий қилинади. Шунингдек, 2023 йил 1 декабргача туманларда (шаҳарларда) атмосфера ҳавоси ифлосланиши фон мониторингини амалга ошириш учун автоматлашган кичик станциялар ўрнатилади.

2025 йил якунигача республика ҳудуди бўйича атмосфера ҳавосининг табиий ифлосланиши юқори бўлган ҳудудларни прогнозлаш ва аҳолини барвақт огоҳлантириш тизими синов тариқасида жорий этилади. 2024 йил якунигача ҳудудларни экологик баҳолаш бўйича индикаторлар асосида “эcо-индиcатор.уз” рейтинги шакллантирилади ва ҳар бир ҳудуднинг экологик паспорти эълон қилинади.

Фармонга мувофиқ, Миллий табиий мерос объектлари рўйхати жорий этилади. 2024 йилдан, жумладан, қуйидагилар учун ҳар йили 500 миллиард сўм ажратилади:

• “яшил белбоғ”, “яшил боғ” ва “яшил жамоат парк”лар ҳамда “яшил қопламалар” – ҳимоя ўрмонзорларини барпо этиш ва доимий фойдаланувчига топширилгунга қадар сақлаб туриш;
• асосий темир йўл ва магистрал автойўллар бўйида дарахт кўчатларини экиш;
• ҳар бир туман ва шаҳарда 5 гектардан кам бўлмаган майдонларда боғлар барпо этиш.

Шунингдек, 2023 йил якунигача ҳар бир давлат ташкилоти ва ҳокимликнинг ўз боғлари ташкил этилади ҳамда 3 йил давомида парваришланади. 2024 йил 1 январдан уй шароитида ёки касаначилик асосида дарахт ва бута кўчатларини (ниҳол) етиштириш фаолияти ўзини ўзи банд қилган шахслар шуғулланиши мумкин бўлган фаолият (ишлар, хизматлар) ҳисобланади.

Қайд этиш керакки, фармон билан Табиат ресурслари вазирлиги Экология, атроф-муҳитни муҳофаза қилиш ва иқлим ўзгариши вазирлиги деб қайта номланди.

“Эконазорат” ахборот тизими ҳақида

2022 йилда “Эконазорат” ахборот тизими жорий этилган эди. Унга кўра, жисмоний шахслар экология, атроф-муҳитни муҳофаза қилиш ва табиатдан фойдаланиш соҳасидаги ҳуқуқбузарлик акс этган фото ва видеоматериалларни тизимга юбориши ва бунинг эвазига рағбатлантирилиши кўзда тутилган.

Май ўрталарига қадар “Эконазорат” ахборот тизими орқали 419 та фото ва видеофактлар келиб тушган. Шундан 166 та ҳолат (фуқаронинг исми, фамилияси, отасининг исми, доимий яшаш манзили, уяли телефон рақами, банк пластик картаси рақами ва электрон манзили, ҳуқуқбузарлик содир этилган жой, сана ва вақт, ҳуқуқбузарлик содир этган шахс тўғрисидаги маълумотлар кўрсатилмаганлиги сабабли) ўз тасдиғини топмаган.