Арманистон Украинага қарши урушда Россиянинг иттифоқчиси эмас, деди Арманистон бош вазири Никол Пашинян CNN Prima News телеканалига берган интервьюсида. Суҳбат Арманистон ҳукуматининг YouTube’даги каналида чоп этилган.
“Сиз Россия билан иттифоқчимиз, дедингиз. Албатта, баралла айтилмади, лекин менимча, бу сезилиб турибди. Украина билан урушда биз Россиянинг иттифоқчиси эмасмиз. Бу уруш, бу можародан фақат ташвишдамиз, чунки бу барча муносабатларимизга бевосита таъсир қилади”, — деди Пашинян.
Унинг таъкидлашича, Ғарб Арманистон Россиянинг иттифоқчиси, деган гапга эътибор қаратмоқда. Москва эса Ереван Украинадаги “ҳарбий амалиётлар”ни қўллаб-қувватламаётганини кўриб турибди. “Бундан келиб чиқадики, биз бу вазиятда ҳеч кимнинг иттифоқчиси эмасмиз”, — деди Пашинян.
Май ойи ўрталарида Арманистон бош вазири Чехиянинг Respekt нашрига берган интервьюсида Ғарбнинг Россияга қарши санкциялари Арманистон учун “қизил чизиқ” эканини айтганди. “Биз русларга аниқ қилиб айтамиз: сизни хафа қилишни хоҳламаймиз, лекин ўзимизни санкцияларга дучор қилолмаймиз. Бу ерда ҳеч қандай сир йўқ”, — дея Пашиняннинг сўзларини келтирган Armenpress.
Май ойи охирида Арманистон бош вазири мамлакат Коллектив Хавфсизлик Шартномаси Ташкилотининг Қирғизистондаги қўшма машғулотларида иштирок этиш тўғрисида ҳали қарор қабул қилмаганини, чунки Ереванда ташкилот “Арманистондан юз ўгираётгани” ҳақида таассурот пайдо бўлганини айтди. Унинг қайд этишича, КХШТ мамлакатга мониторинг миссиясини юбориш ҳақидаги сўровларга жавоб бермаяпти. “Мен Арманистон КХШТ аъзолигини тўхтатиб туриш ёки музлатиш тўғрисида қарор қабул қилиши мумкинлигини истисно этмайман”, — дея огоҳлантирди Пашинян.
Изоҳ (0)