Қашқадарё вилоятининг Китоб туманида 18 ёшли йигит севган қизи сабаб тенгдошини пичоқлаб ўлдиргани хабар берилди. Бу ҳақда “Дарё” манбаси маълум қилди.
Айтилишича, воқеа 2023 йилнинг 28 май, якшанба куни содир бўлган.
“Қашқадарё вилоятининг Китоб туманидаги ‘Агробанк’нинг олдида 18 ёшли йигит машинада тенгдошини пичоқлаб қўйган. Оқибатда пичоқланган бола воқеа жойида вафот этган”, — дейди манба.
Манбанинг аниқлаштиришича, воқеа 18 ёшли қиз бошқарувидаги машинада содир бўлган.
“Қиз рулда кетаётган бўлган. Олдинда эса бир йигит ўтирган. 18 ёшли йигит қиз сабаб тенгдоши билан тортишиб, орқада ўтирган ҳолда олди ўриндиқдаги йигитнинг бўйнига пичоқ тираган ва пичоқни тортиб юборган”, — дейди воқеа ҳақида гапирган манба.
Қашқадарё вилоят прокуратураси воқеани тасдиқлади ва ҳолат юзасидан Жиноят кодексининг 97-моддаси (қасддан одам ўлдириш) билан жиноят иши қўзғатилганини билдирди.