Теҳрон—Пекин йўналишида IРМ079 рейсини амалга ошираётган Mahan Air авиакомпаниясининг самолёти Тошкентга фавқулодда учиб келди. Бу ҳақда Uzbekistan Airports матбуот хизмати хабар берди.
Қайд этилишича, самолёт 28 май куни маҳаллий вақт билан соат 23:20 да Тошкент аэропортига келиб қўнган.
Қўнишга юрак хуружига учраган йўловчи сабаб бўлган. Йўловчининг соғлиғи ёмонлашгани сабабли экипаж муқобил аэродромга ўтишга қарор қилган.
Аэропортга қўнгач, йўловчи тез ёрдам машинасида олиб кетилган ва малакали тиббий ёрдам кўрсатиш учун тиббий муассасага ётқизилган.
Фавқулодда қўниш билан боғлиқ ҳолатлар
2022 йил октябрда Россия “Азимут” авиакомпаниясининг Москвадан Урганчга учаётган самолёти Самарага фавқулодда қўнганди. Бунга йўловчилардан бирининг соғлиғи ёмонлашгани сабаб бўлган. 18 январь куни эса “Аэрофлот” компанияси самолёти Москвадан Гоага учаётган вақтида Урганчга қўндирилган эди. Февраль охирларида “Азимут” авиакомпаниясининг Самарқанд—Уфа йўналиши бўйлаб учган самолёти техник сабабларга кўра “Самарқанд” халқаро аэропортига қайтганди.
Изоҳ (0)