Андижонда 20 ёшли йигит сувга чўкиб кетди. Бу ҳақда Бош прокуратура матбуот котиби Ҳаёт Шамсутдинов “Дарё”га маълум қилди.
Ижтимоий тармоқларда Андижон вилояти Марҳамат туманида йигит севган қизини каналдан қутқармоқчи бўлиб, ўзи чўкиб кетгани тўғрисида хабарлар тарқалди. Таъкидланишича, Марҳамат туман прокуратураси томонидан фуқаро А.Н.нинг сувда чўкиб вафот этгани юзасидан терговга қадар текширув ҳаракатлари ўтказилмоқда.
Аниқланишича, 5 май куни соат 18:00 ларда шу туманда яшаган 20 ёшли йигит А.Н. “Роҳат” МФЙ ҳудудидан оқиб ўтувчи Жанубий Фарғона каналига чўкиб кетган. Ҳолат юзасидан сўралган гувоҳларнинг кўрсатмасига кўра, у шу туманда яшовчи, ўзига аввалдан таниш бўлган қиз Г.Х.ни қутқариш мақсадида сувга тушган. Қиз атрофдаги одамлар томонидан қутқариб қолинган.
Терговга қадар текширув ҳаракатлари давомида А.Н.нинг жасадини топиш бўйича тегишли ташкилотларга топшириқлар берилган. Натижада А.Н.нинг жасади 8 май куни 11:30 ларда Жанубий Фарғона каналининг “Полвонтош” МФЙ ҳудудидан оқиб ўтувчи қисмидан топилган.
Ҳолат юзасидан терговга қадар текширув ҳаракатлари давомида шахслардан тегишли тушунтириш хатлари олиниб, тегишли ташкилотларга алоҳида топшириқлар юборилиб, суд-тиббий экспертизаси тайинланган.
Ўзбекистонда чўкиб кетиш ҳолатлари
Ўзбекистонда 2022 йил ёз мавсумида 142 нафар фуқаро чўкиш билан боғлиқ вазият туфайли вафот этган. Бахтсиз ҳодисалар 51 ҳолатда чўмилиш тақиқланган, рухсат этилмаган, чўмилиш учун шароит бўлмаган, хавфли сув ҳавзаларида чўмилганлик оқибатида, 85 ҳолатда эса эҳтиётсизлик сабаб юзага келган.
Ушбу чўкканларнинг 45,3 фоизи вояга етмаганлар ҳисобига тўғри келади. Эҳтиётсизлик оқибатида юзага келган 85 кишининг чўкиши дарёлар, каналлар ҳамда ариқларнинг устидаги сув, газ, чиқинди оқова сув қувурларидан йўлни қисқартириш мақсадида кўприк сифатида фойдаланиб ўтишлари ҳамда сув ҳавзалари қирғоқ бўйларида хавфсизлик қоидаларига риоя этмагани сабабли юз берган.
Ҳолат юзасидан ҳозирда терговга қадар текширув ҳаракатлари давом эттирилмоқда, натижаси юзасидан қонуний қарор қабул қилиниши таъминланади.