Корея институти билан 6,6 млн доллар миқдоридаги грант лойиҳасини амалга ошириш бўйича битим имзоланди, деб хабар бермоқда Табиат ресурслари вазирлиги матбуот хизмати.
Маълум қилинишича, Жанубий Кореяда Табиат ресурслари вазирлиги ва Корея атроф-муҳит саноати ва технологиялари институти (КЕITI) ўртасида Жиззах вилоятида тиббиёт чиқиндиларини утилизация қилиш ва полигонлардан чиқаётган газларни ушлаб қолувчи объектларни қуриш лойиҳаси доирасида дастлабки истиқболлари муҳокама қилинди. Ушбу институт билан қиймати 6,6 млн доллар миқдоридаги грант лойиҳасини амалга ошириш бўйича битим имзоланди.
Лойиҳа доирасида 500 кВт-1 МВт қувватига тенг чиқинди полигонларидан чиқаётган газларни йиғиш иншоотини қуриш, 500 кВт-1 МВт қувватга эга электр станциясига уланиши мумкин бўлган чиқинди газ йиғиш тизимини қуриш, кунига 5-10 тонна тиббиёт чиқиндиларни ёқиш иншоотини ўрнатиш, моддий техник базани мустаҳкамлаш мақсадида махсус техникалар ва бошқа қурилмалар харид қилиш режалаштирилган.
Шунингдек, 6 та чиқиндиларни қайта юклаш станциясини қуриш, 5 та янги полигон қуриш ҳамда янги қурилган полигонларга тиббиёт чиқиндиларни ёқиш усули билан йўқ қилиш ускунаси, компост қилиш ускунаси, контейнерлар ва махсус техникалар харид қилиш кўзда тутилган.
Учрашувда келгусида KEITIнинг Тошкентдаги офисини очиш истиқболлари ҳам муҳокама қилинган. Мазкур офис бутун Марказий Осиё давлатлари учун минтақавий марказ сифатида хизмат қилади.
Изоҳ (0)