Франциялик мураббий Зинидин Зидан Саудия Арабистонининг “Ан-Насср” клубида ишлаш таклифини рад этди. Бу ҳақда Foot Mercato хабар берди.
Хабарга кўра, “Ан-Насср” “Реал Мадрид” собиқ мураббийига икки йиллик фаолияти учун 150 миллион евро таклиф қилган. Бироқ франциялик мутахассис бу таклифни рад этган. Қайд этилишича, Зинидин Зидан Европанинг топ-5 лигаларида ўйнайдиган жамоаларнинг алоқага чиқишини кутмоқда.
Маълумот учун, франциялик мураббий 2021 йилда “Реал”ни тарк этган ва шундан бери ҳеч қайси жамоада ишламади.
“Ан-Насср” Саудия Арабистони чемпионатида 28 турдан кейин 63 очко билан 2-ўринда бормоқда. Ар-Риёд шаҳри жамоаси бош мураббийи Руди Гарсия истеъфога чиқарилгач, унинг вазифасини Динко Еличич эгаллаганди. Жамоа сафида Зидан билан “Реал”да бирга ишлаган Криштиану Роналду тўп суради.
Франциянинг “ПСЖ” жамоаси ҳам Зинидин Зиданни бош мураббий этиб тайинлашни хоҳлаётгани ҳақида хабарлар тарқаганди.
Аввалроқ “ПСЖ” футболчиси Лионель Мессига ҳам Саудия Арабистони клуби томонидан йилига 500 миллион евродан кўпроқ маошли шартнома таклиф қилинаётгани хабар берилганди. Шунингдек, ҳужумчининг “Ал-Ҳилол”га ўтишида мамлакат ҳукумати ҳам иштирок этиши мумкинлиги маълум бўлган. Саудияликлар Леони мамлакатга олиб келиш учун унинг қатор жамоадошларини ҳам таклиф этмоқчи экани эълон қилинганди.
Изоҳ (0)