Тошкент шаҳар Мирзо Улуғбек туманида жойлашган кўп қаватли уйдаги хонадон балконига илинган Украина байроғи махсус кран орқали олиб ташланди. Бу ҳақда BBC Узбек нашри хабар берди.
Унга кўра, ҳолат 24 май куни соат 18:00 атрофида юз берган. Хонадон соҳиби Режеп Латипов воқеа юз берган пайт уйда ҳеч ким бўлмагани, ўзи турмуш ўртоғи билан Туркияда эканини билдирган. Байроқ олиб ташланишидан уч соатча аввал ўзини Мирзо Улуғбек туман ИИБ ходими деб таништирган шахсдан қўнғироқ бўлган.
“Адашмасам, ўзини жиноят-қидирув бўлимидан Мурод деб таништирди. Шу уй менга тегишли эканлиги ҳақида сўради. Яна ўзингиз ё рафиқангиз Украина фуқароси эмасми, деган савол берди. Мен йўқ, дедим. Кейин нега балконимда Украина байроғи тургани сабабини суриштирди”, — дейди хонадон эгаси.
Унинг таъкидлашича, Украинанинг Черновси шаҳрида туғилган, аммо доимий Ўзбекистонда яшаб, ишлаб келади. У нафақат Украинада туғилгани, балки Россия очган урушга жиддий қарши бўлгани учун ҳам Украина байроғини хонадонида сақлаганини айтган.
Изоҳ (0)