Ўзбекистонда 4 йилда магистрал ва маҳаллий аҳамиятга эга қанча йўллар таъмирланиши маълум қилинди

Ўзбекистонда 2023—2027 йиллар давомида 177 километр узунликдаги магистрал ва 1 947 километр узунликдаги маҳаллий аҳамиятга эга йўллар таъмирланиб, фойдаланишга топширилиши режалаштирилган.

23 май куни бўлиб ўтган Олий Мажлис Қонунчилик палатасининг навбатдаги мажлисида қайд этилишича, йўллар халқаро молия институтлари маблағлари ҳисобидан 920,9 млн долларлик 5 та лойиҳа амалга оширилган ҳолда таъмирланади.

Қайд этилишича, 2017—2022 йиллар давомида республика ва маҳаллий бюджетлар маблағлари ҳисобидан жами 80 531 километр автомобиль йўлларини қуриш, реконструкция қилиш ва таъмирлаш, шунингдек, 1 265 дона кўприклар ва йўл ўтказгичларни реконструкция қилиш ва таъмирлаш ишлари амалга оширилди.

Ўзбекистоннинг халқаро транспорт коридорлари ҳисобланган халқаро аҳамиятдаги А-380 Ғузор—Бухоро—Нукус—Бейнеу автомобиль йўлининг 195 километри, А-373 М-39 автомобиль йўли—Гулистон—Бўка—Ангрен—Қўқон ва Андижон орқали—Ўш автомобиль йўлининг 140 километри, М-39 Олмаота—Бишкек—Тошкент—Термиз автомобиль йўлининг 179 километри, М-37 Самарқанд—Бухоро—Туркманбоши автомобиль йўлининг 71 километри, Қарши—Шаҳрисабз йўналишидаги автомобиль йўлининг 21 км қисмлари реконструкция қилинди.