“Foton” заводининг устав капиталидаги 85,6 фоиз давлат улушини хусусийлаштириш жараёни бошланди. Бу ҳақда Давлат активларини бошқариш агентлиги хабар берди.
Хусусийлаштириш бўйича профессионал консалтинг компаниясини жалб этиш юзасидан танлов эълон қилинди.
Барча қизиқиш билдирган талабгорлар таклиф тақдим этиш учун сўровномага асосан тижорат таклифларини 2023 йил 31 май куни соат 18:00 га қадар тақдим этиши керак.
Агар, биргаликда қўшма тижорат таклифи тақдим этилса, жалб қилинган шерик — консултантнинг ҳам ишини мувофиқлаштириш учун масъул бўлган ва жавобгарликни зиммасига оладиган асосий консултант кўрсатилиши лозим.
Завод ҳақида қисқача маълумот
“Foton” — электрон қисмлар ишлаб чиқарадиган корхона ҳисобланади. Ҳозирда, унда 296 нафар иш ўрни мавжуд. Устав капитали 1,08 млрд сўм.
Жамиятнинг юридик манзили: Тошкент шаҳри, Миробод тумани, А.Темур кўчаси, 13.
Аввалроқ “Чиноз нефтни қайта ишлаш заводи”ни хусусийлаштириш учун аризаларни қабул қилиш муддати узайтирилгани ҳақида хабар берилганди.
Изоҳ (0)