Яқинда Айдан Шенер 60 ёшга тўлди. “Чолиқуши” юлдузи бундан 40 йил олдин томошабинлар қалбини забт этган, аммо ҳозир ҳам фильмларда рол ўйнашда давом этмоқда. Бироқ бугунги кунда актриса нафақат фильмларда суратга тушиш, балки хайрия ишлари билан ҳам банд.
Айдан Шенер 1963 йилда Туркияда туғилган. 18 ёшида у “Туркия гўзали” танловида қатнашиб, ғолиб бўлади. Ўша йили у “Дунё гўзали”да ҳам иштирок этади, аммо у ерда муҳим ўринни эгаллолмайди.
Бир мунча вақт Айдан модель бўлиб ишлайди, реклама роликларида суратга тушади ва мода журналларининг муқоваларида пайдо бўлади. 1983 йилда қиз “Кичик хўжайин” сериалида роль ўйнайди.
Шенернинг айтишича, агар актриса бўлмаганида, журналистликка ўқирди. Зеро журналистикага мактаб давриданоқ иштиёқи баланд эди. У шундай деди: “Мен янги одамлар билан танишишни яхши кўраман — одамлар билан мулоқот қилишни, кузатишни, мулоҳаза юритишни ва шунчаки севишни яхши кўраман”.
1983 йилда у футболчи Айхан Акбинга турмушга чиқади. Бу никоҳдан уларнинг Эджем исмли қизи дунёга келади. Актрисанинг сўзларига кўра, эри Айданнинг актрисалик қилишига қарши бўлади, туғилган кунида унга паранжи совға қилади. Бир-бирларини тушуна олмаган жуфтлик 8 йиллик турмушдан кейин ажралишади.
Актрисанинг гўзаллиги ҳеч кимни бефарқ қолдирмайди. У кино ижодкорларида ҳам катта таассурот қолдиради. 1986 йилда “Чолиқуши” сериалида ўйнаганида изланувчан актриса 23 ёшда эди. Бу роль унга оламшумул шуҳрат келтиради.
1989 йилда Шенер “Сомон йўли” телесериалида ҳам бош ролда ўйнайди. 1991 йилда у “Истанбулнинг икки юзи” телесериалида уни ақлдан озар даражада севган ҳалол ва одобли йигитнинг ўрнига, бой куёвни танлаган қиз ролини ўйнайди.
У янги фильмларда суратга тушишни фаол давом эттиради — ўша вақтда актриса 10 дан ортиқ фильмларда иштирок этади. “Бир манзилли севги” телефильми ва “Ҳаётдан қувилиш”, “Қалбимдаги денгиз” сериаллари шулар жумласидандир. Яқинда у “Менежеримга қўнғироқ қилинг” сериалининг бир эпизодида ва “Юрак оғриғи” сериалининг 18 эпизодида суратга тушди.
Ажралишдан кейин Айдан қайта турмушга чиқмади. У ҳаётини қизига ва уйсиз ҳайвонларга ёрдам беришга бағишлади. Ҳозирда у эгасиз қолган ҳайвонларни қўллаб-қувватлашга қаратилган ижтимоий лойиҳаларда иштирок этади. Ижтимоий тармоқлардаги саҳифаларида ҳайвонлар билан тушган суратларни тез-тез қўйиб туради.
“Мен ҳайвонларни одамлар каби яхши кўраман. Уларнинг барчаси бегуноҳ ва бизга ҳақиқатан ҳам керак. Лекин ҳайвонларга ёмон муносабатда бўлган одамларни ёқтирмайман. Умуман олганда, ўзимни яқин йилларда уйсиз мушук ва итлар яшайдиган кичик бошпана эгаси сифатида кўраман”, — дейди актриса.
Актрисанинг қизи онасининг изидан бормасликка қарор қилган, гарчи у актрисаликка ўқиган ва ҳатто бир нечта телесериалларда ўйнаган бўлса-да. Ҳозирда қиз архитектура ва дизайнга жуда қизиқади. Шенер у ҳақида шундай дейди: “У менинг ҳаётим. Қизим ҳақиқий идеалист ва менга Феридени эслатади”.
Бугунги кунда Айдан Шенер нафақат сериалларда рол ўйнайди, балки турли телешоуларда тез-тез меҳмон бўлиб, театр спектаклларида ҳам иштирок этади. Шенер жами 30 дан ортиқ фильмларда роль ўйнаган ва уларнинг барчаси шу қадар хилма-хилки, уни битта ролли актриса деб ҳисоблаш адолатдан бўлмайди.
Изоҳ (0)