Ҳиндистон шимоли-шарқидаги Манипур штатида юз берган этник тўқнашувларда 54 киши ҳалок бўлди, 150 дан ортиқ одам жароҳатланди. Бу ҳақда BBC хабар берди.
Маҳаллий қабила гуруҳи норозилиги этник зўравонликка айланиб кетганидан сўнг Манипур штатига минглаб аскар юборилган. Расмийлар ҳудудга қўшин юборганига қарамай, янги зўравонлик ҳаракатлари содир бўлган. Ҳукумат тартибсизликларни жиловлаш учун интернетни ҳам ўчириб қўйган ва “ўта оғир ҳолатлар”да” қурол ишлатишга буйруқ берган.
Маҳаллий полиция зўравонлик авж олганидан кейин вазият кескинлигича қолаётганини айтмоқда.
Таъкидланишича, тўқнашувлар 5 май куни бошланган. Бунга мейтей қабиласидан бўлган муҳожирларнинг Манипурда “рўйхатга олинган каста” мақомини олиши талаби сабаб бўлган, бу уларга кўпроқ имтиёзлар беради.
Маҳаллий аҳоли — кукилар буни адолатсизлик деб ҳисоблаб, норозилик билдира бошлаган ва “қабилалар бирдамлик марши”ни ўтказган. Шундан сўнг тўқнашувлар бошланган. Мейтейлар ҳиндулар бўлиб, маҳаллий аҳолининг христиан черковларига бостириб кирган ва погромлар уюштирган. Черков раҳбарлари федерал ҳокимиятдан ёрдам сўраган.
Тўқнашувлар содир бўлган ҳудудларда назорат пунктлари ўрнатилган. Мудофаа вазирлиги вакилининг айтишича, ҳарбийлар томонидан тўқнаш келган ҳудудлардан жами 13 минг киши эвакуация қилинган.
Изоҳ (0)