Наманган вилояти Чуст туманида тадбиркордан улуш талаб қилган шахслар қўлга олинди, деб хабар беради Бош прокуратура ҳузуридаги департамент.
Маълум қилинишича, департаментнинг Чуст туман бўлими томонидан ДХХ ходимлари билан ҳамкорликда тезкор тадбир ўтказилган. Тадбирда туман Тиббиёт бирлашмаси бош ҳисобчиси Б.С. “Ч.О.” МЧЖ билан тузилган шартномага асосан тиббиёт бирлашмасига озиқ-овқат маҳсулотлари етказиб бериш учун ўтказиб берилган 1,3 миллиард сўм эвазига МЧЖ иш бошқарувчи М.М.дан ушбу маблағларнинг 10 фоизи миқдорида “улуш” талаб қилган.
У шундан 2,3 минг долларни олган вақтида ушланиб, унинг кўрсатувига асосан давом этган тадбирда, бирлашма бош шифокори С.К. бош ҳисобчидан юқоридаги пулларни олган вақтида қўлга тушган.
Мазкур ҳолат юзасидан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари ўтказилмоқда.
Апрель ўрталарида Бухоро вилояти Шофиркон туманида фуқародан таҳдид орқали 10 минг доллар талаб қилган шахс ушлангани, бир неча кун олдин эса қарз эвазига берилган пуллардан фоиз сифатида 1 000 долларни товламачилик йўли билан талаб қилган жиноий гуруҳ қўлга олингани тўғрисида хабар берилганди.
Изоҳ (0)