“Киночилар уйи”да бир ярим йил мобайнида маҳоратли режиссёр Дилмурод Масаидов томонидан суратга олинган “Судья” фильмининг премьераси бўлиб ўтди. Лойиҳада бош ролни ижро этган актриса Шодия Абдуқодирова нима сабабдан экранларда кўриниш бермаётгани, янги фильм билан ишлашда қандай қийинчиликларга дуч келгани ҳақида сўзлаб берди.
“Ҳозирги кунда фарзандларимнинг тарбияси билан бандман. Оилавий муҳитда онанинг ўрни беқиёс. Мендан яхши рол ижро этадиган актрисалар кўп, бироқ онанинг ўрнини ҳеч ким боса олмайди. Ҳозир оиламга кўпроқ вақт ажратяпман, бу эса бахт.
Сценарий мени ўзига мафтун этди. Охирги пайтларда рол, сценарий танлашга жиддий қараяпман. Ҳаётда шундай пайт бўларканки, вақтни нимага сарфлаётганимиз кўпроқ қизиқ бўлиб қоларкан. Агар фарзандларимдан вақтимни орттириб, фильмларга, суратга олиш жараёнларига арзисагина боришим мумкин. Жиддий, юки бор фильмларда суратга тушишга ҳаракат қиляпман.
Бу лойиҳада актёр эркинлигини талаб қилмайдиган рол ўйнайман, чунки ҳамма нарса ёзилган, қолип бор, сценарий бор, тартиб бўйича давом этиши керак. Образимнинг аёл, рафиқа, она сифатидаги кечинмаларини ифодалашда режиссёр эркинлик берди. Ўйлайманки, бу тўғри қарор. Бу жараёнда инсон судьянинг мантиясини кийгандан кейин унинг қолипига тушишга мажбур бўлади”, — дейди актриса Шодия Абдуқодирова.
“Дилмурод Масаидов билан ишлаш жуда қийин. У жуда ҳам талабчан режиссёр, бизга берган вазифалари ҳам оддий эмас. У шунчаки оддий онанинг ролини ўйнаб беринг, демайди. Иложи борича берган топшириқларига қулоқ солган ҳолатда ишлашга ҳаракат қилдик. Ўйлайманки, талабига жавоб берадиган фильм бўлди, чунки фильмни режиссёрнинг ўзи кўра билади. Ҳар бир режиссёр рассом бўлади. Олаётган нарсасини ўзи чизиб чиқади, шунинг учун биз актриса, актёр сифатида режиссёрнинг талабини бажаришга ҳаракат қилдик, лекин шунга яраша қийинчиликлар ҳам бўлди”, — дейди актриса Муяссар Бердиқулова.
“Фильмни суратга олиш жараёнларида катта қийинчиликлар бўлди. Халқимизнинг олқиши, чиройли муносабати билан бу қийинчиликлар эсдан ҳам чиқиб кетди. Жуда кўп номзодлар кўриб чиқилган эди. Бу лойиҳа аслида 30 қисмли сериал эди. Рол учун еттита номзод кўрилган эди, шулардан Шодияга насиб қилди, уни танлаганимиз тўғри бўлди деб ўйлайман. Умумий суратга олиш жараёнлари олти ой давом этди. Бу дам олиш кунлари, бошқа сабаблар билан чўзилди”, — дейди фильм режиссёрининг ёрдамчиси.
Судья аёлнинг ҳаёт йўли ҳақида ҳикоя қилувчи янги сериал
Кинематография агентлиги буюртмасига биноан суратга олинган “Судья” сериали Азиза исмли судья аёлнинг ҳаёт йўлига бағишланган. Фильмда Азизанинг шахсий ҳаёти билан параллел равишда судья сифатидаги фаолияти ҳикоя қилинади.
Сериал Азиза тимсолида юртимизда фаолият олиб бораётган барча судьяларга бағишланади. Сериалнинг мақсади судьялар ҳам бошқа инсонлар каби хатоларга йўл қўйиши, ўз вақтида хатоларини тузатиши ва энг асосийси, улар ҳам барча одамлардек оддий инсонлар эканлиги, лекин уларнинг ҳаётдаги бош ғояси адолат ва ҳақиқатни қарор топтиришга хизмат қилиш эканлигини томошабинга бадиий талқинда етказишдан иборат. Шунингдек, сериалда давлатимиз раҳбарининг “судлар адолат қўрғони бўлиши керак”лиги ҳақидаги кўрсатмаси ҳаётга қай даражада татбиқ этилаётгани ҳақида аниқ далиллар билан ҳикоя қилинади.
Изоҳ (0)