Туркия президенти Ражаб Тоййиб Эрдўғон Туркиянинг бешинчи авлод КААN қирувчи самолётини намойиш қилди. Бу ҳақда Anadolu хабар берди.
Эрдўғон Анқаранинг Қаҳрамонканзан туманидаги ТUSAŞ аэрокосмик компанияси марказида авиатехникани намойиш қилиш пайтида нутқ сўзлади. У мудофаа соҳасидаги замонавий ишланмалар туфайли Туркия барча соҳаларда: денгизда, қуруқликда, ҳавода ва космосда ўзини намойиш қилаётганини айтди.
Тадбир давомида HÜRJET самолёти, АТАК-2 вертолёти, ANKA-3 зарба берувчи дрони ва бешинчи авлод маҳаллий самолётларининг сўнгги ишланмалари тақдим этилди.
КААN синовлари келгуси йилларда якунланиши режалаштирилган, шундан сўнг энг илғор хусусиятларга эга самолётлар Туркия ҳарбий ҳаво кучларига топширилади.
“ КААN ҳарбий-ҳаво кучларига топширилганидан сўнг Туркия дунёнинг 5-авлод самолётларини ишлаб чиқарадиган беш давлатдан (АҚШ, Россия, Хитой, Япония) бирига айланади, бу мамлакатимиз фахридир”, — деди Туркия президенти.
Эрдўғон Туркияда ишлаб чиқилган HÜRJET самолёти лойиҳасига ҳам эътибор қаратди.
“HÜRJET яқинда Турк қуролли кучлари томонидан қабул қилинади. У денгиз флотининг флагмани — ТSG Anadolu бортида ҳам жойлаштирилади. HÜRJET маҳаллий радарлар ва турк қуроллари билан жиҳозланади, улар ҳарбий-ҳаво кучларининг F-16 флотининг ўрнини қисман эгаллайди”, — деди президент.
Эрдўғон Туркия дўст давлатлар ва иттифоқчилар эҳтиёжлари учун яна бир маҳаллий самолёт – Hürkuş (Ҳуркуш) ишлаб чиқаришни йўлга қўйганини айтди.
“Бугунги кунда Ҳуркуш ишлаб чиқариш майдончасини халқаро майдон деб аташ мумкин. Биринчи самолётлар тез орада Нигер ва Чадга топширилади”, — деди у.
Бундан ташқари, сиёсатчи Туркия томонидан ишлаб чиқилган янги зарба берувчи ANKA-3 дрони парвози яқин кунларда амалга ошишини айтди. У муҳим вазифаларни бажариш учун мўлжалланган, деди сиёсатчи.
“20 йиллик саъй-ҳаракатлар туфайли Туркиянинг мудофаа секторидаги импорт ўрнини босиш даражаси 80 фоизга етди. Бироқ бунда тўхтаб қолмоқчи эмасмиз. Бунинг ортидан янги ташаббуслар бўлади”, — деди у.
Эрдўғон Туркия мудофаа компаниялари ишланмалари бугунги кунда дунёнинг ўнлаб мамлакатларига экспорт қилинаётганини таъкидлади.
“Гап маҳсулотларнинг кенг ассортименти ҳақида кетмоқда: Bayaktar Тb-2 дан тортиб ANKA’гача”, — хулоса қилди Туркия раҳбари.
Изоҳ (0)