Тошкент шаҳрида Соғлиқни сақлаш вазирлиги билан ҳамкорликда Ўзбекистон репродуктив тиббиёт ассосиациясининг “Репродуктив технологиялар — янги ҳаётга йўл” мавзусидаги I конгресси иш бошлади.
Анжуманда дунёнинг 15 та давлатидан қарийб 100 нафар олимлар, экспертлар ва инвесторлар иштирок этмоқда. Тадбирда сўзга чиққан Соғлиқни сақлаш вазири Амрилло Иноятов соғлиқни сақлаш соҳасида хусусий сектор улуши йилдан йилга ортиб бораётганини эътироф этди.
“Илгари репродуктив тиббиёт йўналишида давлат ва хусусий сектор ҳамкорлиги яхши йўлга қўйилмаган эди. Ваҳоланки, бугун юртимизда акушерлик ва гинекология, педиатрия, репродуктология бўйича 1500 дан зиёд хусусий тиббиёт ташкилотлари фаолият олиб бормоқда.
Биз келгусида ушбу муассасалар имкониятларидан самарали фойдаланиш, соҳага инвестицияларни янада кенг жалб қилиш мақсадида 15 та перинатал марказ ва 3 та республика даражасидаги туғуруқ муассасаларида давлат-хусусий шериклик асосида “Ёрдамчи репродуктив технологиялар марказлари”ни ташкил этмоқчимиз”, — деди вазир.
Хусусан, ёрдамчи репродуктив технологиялар асосида хизмат кўрсатувчи 10 дан зиёд клиникаларнинг 6 таси чет эл инвесторлари иштирокида ташкил қилинган. Амрилло Иноятов сўзини давом эттириб, халқаро вакиллар ва маҳаллий мутахассисларга ўзаро ҳамкорлик бўйича қатор таклифлар билдирди. Жумладан, хусусий туғуруқ комплексларини барпо этишга чақириб, у ерда кўрсатилган хизматларни давлат томонидан сотиб олинишига кафолат берилишини таъкидлади.
Изоҳ (0)