“Ўзбекистон миллий электр тармоқлари” йил бошидан бери 846 млрд сўм зарар кўрди

“Ўзбекистон миллий электр тармоқлари” компанияси 2023 йилнинг биринчи чорагида 846 млрд сўм зарар кўрди. Бу ҳақда компания молиявий ҳисоботидан маълум бўлди. 

Компания уч ойда 7,3 трлн сўм даромад олган. Шунга қарамай, 8 трлн сўмлик харажат ҳам қилинган. 

“Ўзбекистон миллий электр тармоқлари”нинг даромади биринчи чоракда 2022 йилнинг мос даврига нисбатан 2,2 трлн сўмга кўпайган ва харажатлар ҳам бир вақтнинг ўзида 1,5 трлн сўмга ошган. 

Компания жорий йилнинг илк чорагида 846 млрд сўм зарар кўрган бўлса ҳам, 2022 йилнинг дастлабки чорагига нисбатан унинг зарари 645 млрд сўмга камроқ бўлган. 

“Ўзбекистон миллий электр тармоқлари” матбуот хизмати ҳолат бўйича “Дарё”га изоҳ берди

“Бунга сабаб, Акциядорлик жамиятининг молиявий фаолияти бўйича асосий даромади — электр энергиясини ягона хариди ва сотишидан шаклланади. Яъни, ҳисобот бўйича асосий зарарни маҳсулот (товар, иш ва хизмат) ларни сотишнинг ялпи зарари 707,4 милиард сўмни ташкил этган. Бунда ушбу тарифлар Вазирлар Маҳкамаси ҳузуридаги Идоралараро таъриф комиссияси томонидан белгиланиб, 2023 йил 1-чорагида электр энергиясини ишлаб чиқарувчи корхоналардан жами 18,6 млрд. кВт соат электр энергияси ўртача ҚҚС билан 426,2 сўмдан харид қилиниб, Ҳудудий электр тармоқ корхоналарига 18,8 млрд.кВт соат ҳажмда ўртача 405,4 сўмдан сотилган, яъни ҳар бир кВт соатдан 20,8 сўмдан зарар кўрилган”

“Ўзбекистон миллий электр тармоқлари” қандай компания? 

“Ўзбекистон миллий электр тармоқлари” акциядорлик жамияти президентнинг 2019 йил март ойидаги қарорига мувофиқ ташкил этилган. Компания Энергетика вазирлиги тизимида фаолият юритади.

Асосий фаолият турлари қуйидагилар:

• Ўзбекистоннинг магистрал электр тармоқларидан фойдаланиш ва уларни ривожлантириш;
• электр энергияни магистрал электр тармоқлари орқали етказиб бериш;
• давлатлараро транзитни амалга ошириш;
• қўшни давлатларнинг электр энергетика тизими билан ҳамкорлик қилиш ва бошқалар.

“Ўзбекистон миллий электр тармоқлари” марказий аппарати ва таркибидаги тузилма ҳамда филиалларда жами бўлиб, 4300 нафардан ошиқ ходим ишлайди.