Икки муқаддас масжид ходимининг Ўзбекистондаги элчиси Юсуф бин Солиҳ ал-Гаҳра Судандаги низо юзасидан баёнот берди. Бу ҳақда “Дарё”га элчихона ахборот хизмати хабар берди.
Маълум қилинишича, Саудия Арабистони подшоҳлиги Икки муқаддас масжид ходими ва унинг содиқ валиаҳди кўрсатмаларига биноан қардош Судан Республикасидан фуқароларни эвакуация қилиш ишларини амалга оширган.
Саудия Арабистонининг подшоҳлик ҳарбий-денгиз кучлари Қуролли кучларнинг бошқа бўлинмалари билан амалга оширган эвакуация қилиш ишлари Судан Республикасида низо бошлангандан бери денгиз орқали амалга оширилган биринчи эвакуация ҳисобланади. Эвакуация ишлари фуқароларни Хартумдан Порт Судан бандаргоҳига олиб келишни қамраб олган.
Қардош ва дўст мамлакатларнинг Судан Республикасидаги ўз фуқароларини эвакуация қилиш борасидаги сўровларига жавобан подшоҳлик амалга оширган ишлар унинг халқаро ҳамжамиятнинг ишончли шериги сифатидаги ўрни таъкидланиши ҳам бўлди.
Подшоҳлик эвакуация қилган чет элликлар 12 мамлакат (Кувайт, Қатар, БАА, Миср, Тунис, Покистон, Ҳиндистон, Болгария, Бангладеш, Филиппин, Канада ва Буркина Фасо) фуқаролари бўлиб, уларнинг орасида дипломатлар ва халқаро ташкилотлар хизматчилари ҳам бор, жами қардош ва дўст мамлакатлар фуқароларидан 66 киши эвакуация қилинди (яқин кунларда мазкур рақамлар ошиши кутилмоқда).
Судан Республикасидаги биродарларнинг у ерда қолиб кетганларни эвакуация қилиш ишларини амалга ошириш учун яратиб берган енгилликларини подшоҳлик қадрлаши таъкидланган. Подшоҳлик ўз фуқароларига ёрдам кўрсатишни сўраб мурожаат қилган қардош ва дўст мамлакатларнинг фуқароларини эвакуация қилиш борасидаги эзгу ишларни давом эттиради.
Айни пайтда подшоҳлик қардош ва дўст мамлакатларнинг ўз юртларига қайтиш истагида бўлган фуқароларини эвакуация қилиш мақсадида Судан расмийлари билан хавфсиз йўлакларни таъминлаш хусусида бевосита мулоқотлар олиб бормоқда. Келиш жойларида қардош ва дўст мамлакатлар фуқароларига керакли кириш визалари берилиши мувофиқлаштирилмоқда.
Изоҳ (0)