Профессионал бокснинг супер ўрта вазн (-76,2 кг) тоифаси вакили Бектемир Мелиқўзиев (11-1, 9 КО) ўзининг навбатдаги жангини Габриэль Росадога (26-16-1, 15 КО) қарши ўтказади ва улар ўртасидаги жанг 23 апрель тонгида бўлиб ўтади.
Мелиқўзиев ва Росадо ўртасидаги реванш жанги Лас Вегасдаги (АҚШ) бокс оқшоми кардидан ўрин олган. Бу оқшомнинг асосий жанги енгил вазн тоифасида WBA чемпиони Жервонта Дэвис (28-0, 26 КО) ва Райан Гарсия (23-0, 19 КО) ўртасида кечади.
Бектемир ва Габриэль жанг олдидан вазн ўлчаш маросимида иштирок этди. Унга кўра, ҳар иккала боксчи ҳам бир хил 75.89 кг натижа қайд этди.
“Ушбу катта бокс оқшомида жанг қилишимдан хурсандман. Реванш сўрагандим ва унга эришдим. Ҳозир бу энг муҳими. Ўтган иш ўтиб бўлди. Бу бокс. Кўп гапирмайман, ҳаммасини рингда кўрасиз. Ҳозир фақатгина хатолар бўлмаслигини айта оламан.
Росадо истаган нарсасини гапириши мумкин. Бу унинг ҳуқуқи. Мен эса қизиқарли жанг бўлишини таъкидлайман, холос. Қайтараман, реванш жанги ўтаётганидан хурсандман. Жанг неча раунд давом этишидан қатъи назар у қизиқарли ўтади”, — дейди Мелиқўзиев.
Росадо эса: “У биринчи жангдаги ғалабани тасодиф деб атаётганидан норозиман. Бу натижани такрорламоқчиман. Натижа худди шундай бўлади. Тайёргарликни аъло даражада ўтадим. Ўтган галгидек йил нокаутини такрорлашга ваъда бермайман, лекин бу сафар ҳам уни енгишга ҳаракат қиламан. Жангни интизорлик билан кутяпман”, — дейди.
Эслатиб ўтамиз, Бектемир Мелиқўзиев 2021 йил 19 июнида Росадога қарши рингга чиқиб, беллашувнинг 8-раундида аянчли нокаутни қабул қилиб олганди.
Ўша жангдан кейин Росадо 3 бор рингга чиқиб, барчасида (Мунгиа, Шейн Мосли Жуниор ва Али Аҳмедовга) очколар эвазига мағлуб бўлди. Мелиқўзиев эса 4 та жангда ғалаба қозонди: Сергей Екимов, Девид Зегарра, Сладан Жанжанин ва Улисес Сиерра мағлуб этилган.
Изоҳ (0)