Самарқанд шаҳрига 2023 йилда узунлиги 10,5 метр бўлган 100 дона электробус харид қилиниши ва парк қуриш режалаштирилган. Бу ҳақда Самарқанд вилояти ҳокимлиги ахборот хизмати хабар берди.
Инвестициялар ва ташқи савдо вазирлиги, Самарқанд вилояти ҳокимлиги ҳамда Европа тикланиш ва тараққиёт банки ўртасида Самарқанд шаҳрида жамоат транспорти учун 350 дона электробус харид қилиш ва тегишли инфратузилмани яратиш бўйича 95 миллион долларлик лойиҳа амалга оширилмоқда.
Айни пайтда лойиҳанинг биринчи босқичи бўйича ишлар олиб борилмоқда. Хусусан, узунлиги 10,5 метр бўлган дастлабки 100 дона электробус энергетика ускуналарини харид қилиш, электроавтобус паркини қуриш режалаштирилган.
Қайд этилишича, 100 дона электробус сотиб олиш бўйича ўтказилган халқаро тендерлар натижаларига кўра Хитойнинг Yutong Bus Cо.Ltd компанияси ғолиб бўлган. У 30 январь куни лойиҳа оператори сифатида “Самарқанд йўловчитранс” давлат корхонаси билан 29,7 миллион евро миқдорида шартнома имзолаган.
Мазкур электробусларнинг 6 донаси Самарқанд шаҳрига 2023 йилнинг биринчи ярим йиллигида, қолган 94 донаси эса учинчи чорак якунига қадар етказиб берилади.
Тошкентда жамоат транспорти
2023 йил 16 февралдаги “Жамоат транспорти тизимини ислоҳ қилиш чора-тадбирлари тўғрисида”ги президент қарорига асосан, Тошкент шаҳри жамоат транспорти учун 200 дона 18 метрли ва 500 дона 12 метрли табиий газда ишлайдиган автобуслар ҳамда 300 дона 12 метрли электробуслар харид қилиш белгиланган.
Хитойнинг Yutong Bus Cо Ltd компанияси ва “Тошшаҳартрансхизмат” ўртасида тузилган шартномага асосан, 2023 йилнинг март ойи якунига қадар Yutong автобусларнинг 1-партияси, яъни 110 дона автобус ва 150 дона электробуслар Ўзбекистонга етказиб берилиши кутилаётгани тўғрисида хабар берилганди.
Давлат раҳбари 13 декабрь куни Учтепа тумани фаоллари билан ўтказилган йиғилишда бош вазирга март ойигача Тошкентга 1000 дона автобус олиб келиш бўйича топшириқ берганини айтганди. “Жамоат транспортини ислоҳ қилишимиз зарур. Ютуқлар билан бирга, камчиликларимиз ҳам жуда кўп”, — деганди президент.
Изоҳ (0)