Хорижга даволаниш учун борадиган фуқаролар ҳамда Ўзбекистонга келувчи чет эл фуқароларининг тиббий хизмат олишида доимий ҳамроҳлик йўлга қўйилиши мумкин. Бу ҳақда 12 апрель куни “Ўзбекистон соғлиқни сақлаш тизими трансформацияси” мавзусида бўлиб ўтган халқаро форумда соғлиқни сақлаш вазири айтиб ўтди, деб хабар бермоқда “Дарё” мухбири.
Амрилло Иноятов ўз чиқишида маҳаллий ва хорижлик тадбиркорларни қўллаб-қувватлаш учун қуйидаги ишлар амалга оширилишини маълум қилди:
- тиббиёт ташкилотларига берилган солиқ ва божхона имтиёзларини сақлаб қолиш ва узайтириш, тиббиётда фаолият олиб борувчи тадбиркорлар ҳуқуқларини ҳимоя қилиш чоралари кўрилади;
- лицензиялаш жараёни шаффофлиги таъминланади;
- тиббий туризм билан боғлиқ муносабатлар ҳуқуқий тартибга солиниб, соҳада фаолият юритишнинг стандартлари, ягона тизими, тартиби ва механизмлари ишлаб чиқилади;
- кўрсатилаётган тиббий хизматлар сифати ва беморлар хавфсизлигини таъминлаш мақсадида 2025 йилга қадар барча тиббиёт ташкилотларини аккредитациялаш тизими тўлиқ жорий этилади.
- даволаниш учун хорижга борувчи ёки республикага келувчи фуқароларнинг ҳуқуқларини ҳимоя қилиш ва сифатли тиббий хизмат олишларида доимий ҳамроҳлик қилиш йўлга қўйилади.
“Авваллари фуқароларимиз бошқа давлатларда қийналиб, ўртакашлар билан овора бўлиб юрарди. Энди мана шу нарсаларнинг олдини олиш учун ҳар бир беморга ҳамроҳлик қиладиган тизим яратамиз”, — деб айтиб ўтди ССВ раҳбари.
Forum якунида 1 миллиард доллар миқдорида хорижий инвестицияларни жалб этиш кўзда тутилган халқаро меморандумлар имзоланди.