Тошкентдаги тўртта АГТКШ томонидан 7,1 миллиард сўмлик табиий газдан ноқонуний фойдаланиш ҳолатлари аниқланди, деб хабар бермоқда Энергетика вазирлиги матбуот хизмати.
Қайд этилишича, 13—29 март кунлари “Ўзэнергоинспекция” ва ҳуқуқни муҳофаза қилувчи органлар билан ҳамкорликда Тошкент шаҳрида ўтказилган назорат тадбирларида тадбиркорлик субъектларига қарашли тўртта автомобилларга газ тўлдириш компрессор шохобчаси (АГТКШ) томонидан табиий газдан ноқонуний фойдаланиш ҳолатлари аниқланди.
Мазкур ноқонуний ҳолатлар натижасида давлат манфаатларига етказилган умумий зарар миқдори 7,1 миллиард сўмни ташкил этган.
Жумладан:
- Юнусобод туманида жойлашган АГТКШ томонидан 2,372 миллиард сўмлик;
- Сергели туманида жойлашган АГТКШда 1,728 миллиард сўмлик;
- Мирзо Улуғбек туманида жойлашган АГТКШда 1,607 миллиард сўмлик;
- Учтепа туманида жойлашган АГТКШда табиий газдан ноқонуний фойдаланиш натижасида давлат манфаатларига етказилган зарар миқдори 1,392 миллиард сўмни ташкил этган.
Ушбу ноқонуний ҳолатларга ҳуқуқни муҳофаза қилувчи органлар томонидан ҳуқуқий баҳо берилмоқда. Ҳудудларда назорат тадбирлари давом эттирилмоқда.
Изоҳ (0)