Жанубий Кореянинг Инчхон шаҳридан Фарғона вилоятига тўғридан тўғри авиақатнов йўлга қўйилади. Бу ҳақда вилоят ҳокимлиги ахборот хизмати хабар берди.
Хабарга кўра, амалий ташриф билан Корея Республикасида бўлган Фарғона ҳокими Хайрулло Бозоров бошчилигидаги вилоят расмийлари ҳамда тадбиркорларидан иборат делегация Инчхон шаҳар мери Ю Чон Бок билан музокаралар ўтказди. Мулоқот давомида Фарғона вилояти билан Инчхон шаҳри ўртасида иқтисодий-инвестицион алоқаларни ҳамда ижтимоий, маданий бошқа қатор соҳаларда самарали ҳамкорликни ривожлантириш масалалари муҳокама қилинди.
Томонлар ижтимоий, фан-таълим, спорт, санъат ва маданият йўналишларида қўшма тадбирларни доимий ташкил этишга келишиб олди. Мулоқот чоғида Фарғона вилоятида Инчхон эркин иқтисодий зонаси филиалини ташкил этиш масаласи ҳам муҳокама қилинди. Шунингдек, икки шаҳар ўртасида тўғридан тўғри авиарейсларни йўлга қўйиш масаласида олиб борилаётган музокаралар якуний босқичда экани қайд этилди.
Эришилган келишувларнинг ҳаётга татбиқ этилиши бўйича Инчхон шаҳар мерининг ва Фарғона вилояти ҳокимининг ўринбосарлари бошчилигида Ишчи гуруҳ тузиш, ҳамкорлик натижаларини ҳар чорак якуни бўйича онлайн мулоқот давомида муҳокама қилишга келишиб олинди.
Изоҳ (0)