Қашқадарё вилоятининг Китоб туманидаги Рус қишлоқда қурилиб, аҳолига топширилган намунали уй-жойлар қулаб тушиш арафасида экани айтилмоқда. Бу ҳақда аҳоли видеочиқишда маълум қилган.
Мазкур видеода Рус қишлоғида жойлашган хонадонларнинг биридаги вазият тасвирланган.
“Уй деворлари ёрилиб, силжигани сабаб эшиклар ёпилмайдиган бўлиб қолган. Плиталар силжиб, девор орасидан нариги томон кўринади. Уй қулаб тушиб, хонадон вакилларини босиб қолиши ҳам мумкин”, — дейди видеочиқишдаги фуқаролар.
Айтилишича, уй деворларининг силжиши оқибатида хонадондаги электр симлари ҳам тортилиб, узилган.
Видео давомида айтилишича, уйнинг пойдевори ҳам силжиган.
“Бу уйни бузиб ташламаса, яшаш учун жуда хавфли. Бу ердаги аксарият уйлар шу аҳволда”, — дейди видео муаллифи.
Мурожаатчиларнинг аниқлик киритишича, ушбу намунали уйлар 2017—2018 йилларда қурилиб, 20 йил муддатга ипотека кредити эвазига аҳолига топширилган.
“Айни пайтда ойма-ой 2 миллионгача бўлган кредит пулларини тўлаб келяпмиз. Лекин эга бўлганимиз эртага қулаб тушиши мумкин бўлган қўрқинчли уй бўляпти. Бу аҳволда қандай яшашаймиз”, — дейди ушбу хонадон эгаси Нигора Худойқулова.
Нигора Худойқулованинг айтишича, у ушбу хонадонни 2018 йил сентябрь ойида қабул қилиб олган.
.jpg)
“’Асака банк’ка ойма-ой кредит тўлаб келяпмиз. Уйимиз шундай ёрилиб кетгач, банк раҳбариятига ҳам, қурувчига ҳам вазиятни билдириб, менга бошқа уй берилиши кераклигини, кредит тўловини тўламаслигимни айтиб, февраль март ойларидаги тўловини тўлашдан бош тортдим. Банк ходимлари эса уй қулаб тушса ҳам, кредит пулини тўлашга мажбурсиз деб, кредит тўловига пеня ҳам ҳисоблашмоқда. Қурувчи Санжар Ғаниев эса деворларни ямаб бераман дейди. Бу уй деворининг ёриғини ямаса ҳам фойдаси йўқ-ку, бу уйда яшаш ўлимни бўйинга олиш-ку”, — дейди уй эгаси.
“Дарё” воқеалар ривожини кузатишда давом этади.
Изоҳ (0)