“Толибон” ўз армиясидаги ҳарбийлар сонини 200 минг кишига етказиш режасини эълон қилди
Афғонистоннинг ҳукумат тепасидаги “Толибон” ҳаракатига бўйсунувчи Қуролли кучлари сони 200 минг кишига етказилади. Бу ҳақда “Толибон” армияси бош штаби бошлиғи қори Фасиҳуддин Фитрат маълум қилди, деб хабар бермоқда TOLOnews телеканали.
“Келгуси йил армиядаги ҳарбий хизматчилар сонини 150 мингдан 170 мингга оширишга ва аста-секин 200 мингга етказишга қарор қилдик”, — деди у.
2021 йил август ойи ўрталарида “Толибон” Афғонистонда ҳокимиятни қўлга киритган пайтда уларнинг қўл остидаги жангчилар сони 100 минг киши, деб баҳоланган эди. 2022 йил февраль ойида “Толибон” вакиллари ўз Қуролли кучлари сонини 150 минг кишига етказиш ниятида эканини маълум қилишди.
Ҳозиргача “Толибон” ҳатто ўз ҳарбий-ҳаво кучларини яратишга муваффақ бўлган. Ушбу кучлар ихтиёрида ўнлаб самолётлар мавжуд бўлиб, уларни аллақачон жанговар ҳаракатларда қўллаш бошланган.
