Инвестициялар, саноат ва савдо вазирлигининг ташкилий кўмагида Ўзбекистон ва Хитой ҳудудлари ўртасида энергетика ва савдо соҳаларида ҳамкорлик тўғрисидаги икки томонлама шартномаларни имзолаш маросими бўлиб ўтди. Бу ҳақда вазирлик матбуот хизмати хабар берди.
Тадбирда Ўзбекистон томонидан Инвестициялар, саноат ва савдо ҳамда Энергетика вазирликлари раҳбарияти, Тошкент ва Жиззах вилоятлари ҳокимликлари раҳбарлари, Хитой томонидан — ҳудудлар раҳбарлари, шунингдек, икки мамлакат йирик компанияларининг 40 дан ортиқ вакиллари иштирок этди.
Шунингдек, Ўзбекистон энергетика вазири Жўрабек Мирзамаҳмудов ва Huadian Xinjiang Power компанияси бошқаруви раиси Хан Сун Навоий ҳамда Фарғона вилоятларида қуёш электр станцияларини қуриш бўйича ўзаро англашув меморандумини имзолаган.
“Бундан ташқари, имзоланган ҳужжатлар қаторида савдо, қайта тикланувчи энергетика соҳасида ҳамкорлик меморандумлари ҳамда Тошкент вилояти ва Хитойнинг Шинжон-Уйғур автоном райони ўртасида шериклик муносабатларини йўлга қўйиш бўйича келишувлар бор. Битимларда ўзаро ҳамкорликни кенгайтириш учун қулай шарт-шароитлар яратиш мақсадида биргаликда тегишли чоралар кўриш масалалари ўз ифодасини топган”, — дейилади хабарда.
Тадбир доирасида иштирокчиларни ҳар икки ҳудуднинг инвестициявий салоҳияти билан яқиндан таништириш мақсадида иккала томон ҳам тақдимотлар ўтказган.
Маросим якунида эришилган юқори даражадаги ишонч ва шериклик муносабатларига асосланган ҳолда Ўзбекистон ва Хитой ўртасидаги ўзаро манфаатли ҳамкорликни янада ривожлантириш, шунингдек, томонларни қизиқтирган соҳаларда биргаликда олиб борилаётган ишларни фаоллаштиришга содиқлик билдирилган.
Эслатиб ўтамиз, Шавкат Мирзиёев 29 март куни Хитой Коммунистик партияси Марказий қўмитаси Сиёсий бюроси аъзоси, Шинжон-Уйғур автоном райони Компартияси Партқўми котиби Ма Синжуй бошчилигидаги ХХР делегацияси билан учрашув ўтказганди. Учрашувда Ўзбекистон ҳудудлари ва ШУАР ўртасидаги ўзаро манфаатли амалий ҳамкорликни йўлга қўйиш масалалари кўриб чиқилган.
Изоҳ (0)