“Қилаётган ишларимиз кўп, халқимизнинг ўзи бу ўзгаришларга адолатли баҳосини беради” — президент 

Айни вақтда президент Шавкат Мирзиёев раислигида Қорақалпоғистон Республикаси Кегейли туманида йиғилиш бўлиб ўтмоқда. Бу ҳақда “Дарё” мухбири хабар берди. 

Сўнгги олти йилда Қорақалпоғистонда 15 триллион сўм инвестиция ҳисобига 5 300 дан зиёд лойиҳа амалга оширилди. Тадбиркорлар сони 2 баравар кўпайиб, 46 мингта доимий иш ўрни яратилди. 

Илгари саноати энг паст бўлган 6 та туманда ишлаб чиқариш 2-3 баравар ошиб, Қорақалпоғистондаги улуши 12 фоизга етди. Қораўзакда саноат 5 баравар, Элликқалъа, Мўйноқ, Тахтакўпирда 3 баравар, Шуманай ва Нукус туманида 2 баравар ошиб, бу туманларда ишлаб чиқариш 2 триллион сўмга етди. 

“Умуман, сўнгги олти йилда Қорақалпоғистонда саноат 1,3 баравар ўсди, 61 турдаги янги маҳсулотлар ишлаб чиқариш йўлга қўйилди. Айниқса, кимё, қурилиш материаллари, озиқ-овқат, текстиль ва тўқимачилик, фармацевтика саноати маҳсулотларини ишлаб чиқариш 2 баравардан зиёд ўсди. Мана, бугун ҳам сизлар билан биргаликда 1 минг 100 та янги доимий иш ўрнига эга 6 та корхона ишга туширилади”, — деди давлат раҳбари.

Мазкур корхоналар орқали, Қорақалпоғистонда ишлаб чиқаришга 300 миллиард сўм, экспортга 20 миллион доллар қўшилади.

“Лекин, иқтисодиётни ривожлантириш ва аҳолини ишли қилиш бўйича ҳали имкониятлар кўп. Ўтган йили август ойида келиб, ҳамма вазифаларни белгилаб олган эдик. Жумладан, Қорақалпоғистонда тадбиркорликни ривожлантириш ва ижтимоий масалаларни ечиш бўйича катта қарор ва дастур қабул қилинди. Булар билан 2023 йилнинг ўзида 670 миллиард сўм ва 340 миллион доллар маблағлар ажратилди”, — деди давлат раҳбари. 

Шавкат Мирзиёев тадбиркорлар учун фойда, айланмадан солиқ, ер ва мол-мулк солиқлари 2 баравар пасайтирилгани, шунингдек, ижтимоий солиқ 1 фоиз қилиб белгиланини таъкидлади. 

“Бу орқали, Қорақалпоғистоннинг барча тадбиркорлари (23 минг) ихтиёрида йилига 500 миллиард сўм қолаяпти. Фақат ушбу ҳудуд тадбиркорларига тижорат кредитларининг 75 фоизига Тадбиркорлик жамғармаси кафиллиги берилиши белгиланди. Ҳар бир туманга вазирлар, вилоят ҳокимлари, идора ва банклар раҳбарлари бириктирилди. Қилаётган ишларимиз кўп ва буни халқимиз кўриб турибди. Уларнинг ўзи бу ўзгаришларга адолатли баҳосини беради”, — дея қўшимча қилди президент.