“Дарё” интернет-нашрида 10 март куни Сув таъминоти унитар корхонаси ўтказган 85 та тендерда Қурилиш вазирлигига тегишли 2 та корхона қатнашгани, шу сабабли рақобат юзага келмагани ҳақида материал эълон қилинганди. Қурилиш вазирлиги ҳолатга муносабат билдирди.
Ҳаммаси нимадан бошланганди?
Сув таъминоти унитар корхонаси жами бошланғич қиймати 127 миллион 500 минг сўм бўлган 85 та тендер ўтказган бўлиб, уларнинг барчасида 2 та тадбиркорлик субъекти иштирок этган. Булар:
- Тошкент вилояти Қурилишда танлов савдоларини ташкил этиш консалтинг маркази;
- Сирдарё вилояти Қурилишда танлов савдоларини ташкил этиш консалтинг маркази.
Бу корхоналарнинг иккиси ҳам, ҳужжатларга кўра, Қурилиш вазирлиги тасарруфида.
“Дарё” ҳолат юзасидан тегишли органларга харид протоколи ва лот маълумотларини текшириш учун юборди.
“Танлов қонунга мувофиқ амалга оширилган”
Қурилиш вазирлиги ўз муносабатида тендерда ҳеч қандай қонунбузилиш ҳолати кузатилмаганини маълум қилди.
“Сув таъминоти корхонаси фақатгина тендер савдоларини ташкил этиш бўйича консалтинг хизматлари юзасидан танлов ўтказган. Ушбу танловларда Қурилиш ва уй-жой коммунал хўжалиги вазирлиги ҳузуридаги Қурилиш соҳасида танлов савдоларини ташкил этиш бўйича консалтинг марказлари иштирок этган. Ушбу танлов савдолари Давлат харидлари тўғрисидаги қонунга мувофиқ амалга оширилган”, — дейилади хабарда.
“Рақобат муҳити бузилган бўлиши мумкин”
Коррупцияга қарши курашиш агентлигининг ўрганиш натижаларига кўра, тендер шартномасида ҳақиқатан ҳам ҳеч қандай коррупсион ҳолат мавжуд эмас. Аммо агентлик матбуот хизмати тендерда рақобат муҳити бузилган бўлиши мумкинлигини билдириб, маълумотларни Антимонополия қўмитасига юборишни тавсия қилди.
“Расмий хат юборинг”
Шундан сўнг “Дарё” Рақобатни ривожлантириш ва истеъмолчилар ҳуқуқларини ҳимоя қилиш агентлиги матбуот хизматига шубҳали тендерларни текшириш бўйича бир неча бор сўров юборди. Агентлик матбуот хизмати раҳбари Олимжон Ҳасанов эса ҳолатни ўрганиш учун муассасага хат чиқариш кераклигини айтди.
Лекин ахборот хизматларининг фаолияти айнан мана шу турдаги қоғозбозликлардан айро ҳолда, воқеаларга тезкор ва холис жавоб беришни таъминлаш учун ташкил этилган бўлиб, ташкилотлар ва жамоатчилик ўртасидаги бюрократик барерларни йўққа чиқариши керак. Шунингдек, “Жисмоний ва юридик шахсларнинг мурожаатлари тўғрисида”ги қонуннинг 5-моддасига кўра, мурожаатлар тури ва шаклидан қатъи назар, бир хил аҳамиятга эга ҳисобланади.
Президент Шавкат Мирзиёев мамлакатдаги сўз ва матбуот эркинлиги борасида фикр билдириб, “Демократик жамиятда барча давлат хизматчилари оммавий ахборот воситалари билан яқин ижтимоий ҳамкорлик қилишга ўрганиши керак. Агарда ўрганмасак, эртанги ислоҳотлар амалга ошмайди”, — деб бот-бот айтиб келади. Афсуски, айрим давлат ташкилотлари ўз масъулияти доирасидаги вазифаларни бажармай, ҳали ҳам бюрократия ва қоғозбозликка йўл қўяётгани ачинарли ҳол.
Шубҳали тендерлар давом этмоқда
Сув таъминоти унитар корхонаси томонидан 24 март куни 58 та тендер ўтказилган. Лотларнинг умумий қиймати 87 миллион сўм.
Ажабланарлиси, тендерларда юқорида номи зикр этилган Қурилиш вазирлигининг икки корхонаси қатнашган, натижа эса ўша-ўша.
Изоҳ (0)