“Янги машинам калитини докторнинг олдига қўйиб, онамни сақлаб қолишини сўраганман”. Тошпўлат Маткаримов онасининг ўлими унга қандай таъсир қилгани ҳақида (видео)

Ўзбекистонда хизмат кўрсатган артист Тошпўлат Маткаримов “Севимли” телеканалининг “Машҳурлар” кўрсатувига берган интервьюсида онаси вафот этганидан сўнг бир муддат ўзига кела олмагани, энг машҳур даврларини ҳозирда соғинмаслиги ҳақида гапириб берди.

“Янги машинамнинг калитини докторнинг олдига қўйиб, онамнинг ҳаётини сақлаб қолишини сўраганман”

— Энди ижодимни яхшилаб бошлаб олганимда, 1991 йилнинг 18 апрель санасида онам вафот этди. Сочларим ўсган, оловдек юрган пайтларим эди, ўша куни сочимни олдириб ташлаганман. Бир кун олдин кўрган инсон мени танимасди, онамнинг вафот этгани шу даражада таъсир қилган. Врачнинг олдига бориб, янги машинамнинг калитини, ҳамма нарсани қўйганман, нима бўлса ҳаммаси сизга, фақат онамнинг ҳаётини сақлаб қолинг, деб сўраганман. Кейин у “Мен Худо эмасман, бу менга боғлиқ нарса эмас”, — деб айтди. Операция яхши ўтди, лекин унинг асорати ёмон экан. Сочимни олдирганимдан кейин 40 кун уйдан чиқмаганман.

“Мусиқа овозидан чарчаб, тўйларда қулоғимга пахта тиқиб, қўшиқ айтадиган бўлдим”

— Машҳур бўлган даврларим мен учун азобга айланган. Ниҳоятда қийин бўлган, тўхтовсиз жонли ижролар, сафарлар, буни Аллоҳнинг берган роҳатими ёки азобими, деб ўйлаб қолардик. Бирорта радионинг ҳам овозини эшита олмайдиган даражага бордим. Мусиқа овозидан чарчаб, тўйларда қулоғимга пахта тиқиб, қўшиқ айтадиган бўлдим. Бу нарсалар мен учун жуда катта қийинчиликларга айланди, лекин шуни ҳам камайтириб, барчасидан ўтиб олдим.