“100 га яқинидан 73 таси янгиланди”. Деҳқонободдаги жин кўприкларнинг нечтаси янгиланганига аниқлик киритилди (видео)
Қашқадарё вилоятининг Деҳқонобод тумани тоғли ҳудуд ҳисоблангани боис, тумандаги қишлоқларга баҳор мавсумида тез-тез сел келади. Мавсумий селлар эса қишлоқ ҳудудларидаги халқ тилида жин кўприк номини олган қўлбола кўприкларни ювиб, яроқсиз ҳолга келтириб қўяди. Бу нафақат аҳолига, масъулларга ҳам ноқулайлик туғдиради. Сабаби сел суви ювиб кетган кўприкни таъмирлаш яна маҳаллий ҳокимлик гарданига тушади. Ҳокимлик эса илгари таъмирлаган кўпригини яна таъмирлашга, унга такрорий маблағ сарфлашга мажбур бўлади.
Президент Шавкат Мирзиёев Қашқадарё вилоятига ташрифларининг бирида унга мурожаат қилаётган қашқадарёликларнинг аксарияти “кўприк қуриб беринг, президент бува” деб ёзишини айтиб, вилоятдаги долзарб муаммолардан бири кўприк қурилиши билан боғлиқ масала эканини маълум қилганди. Ўшанда давлат раҳбари “Қишлоқда яшаётган одамлар розими? Менга келган хатларнинг кўпида ъкўприк қуриб беринг, президент буваъ деб ёзишган”, — деганди.
Деҳқонобод тумани ҳокими Зоир Алиқуловнинг “Дарё”га маълумот беришича, давлат раҳбарининг бу масалага эътибори биргина Деҳқонободда тўрт ойда 9 та янги кўприк қурилишига сабаб бўлган.
Масъулларнинг маълумот беришича, Деҳқонободдаги мавжуд қишлоқларда 100 га яқин шундай қўлбола кўприклар бўлган. Айни кунга қадар эса уларнинг 73 таси қайта қурилиб, аҳолининг фойдаланиши учун топширилган.
“Президентимиз топшириқлари билан охирги беш-олти йилда 73 та янги кўприк қурдик. Шундан 9 таси сўнгги тўрт ой давомида қурилиб, Наврўз байрами арафасида фойдаланишга топширилди. Яна 5 та кўприк барпо қилиниши режалаштирилган. Бу кўприклар туманимизнинг ‘Белибойли’, ‘Бошчорбоғ’, ‘Бойқўрғон’, ‘Чилгаз’ ҳамда ‘Торқопчуғай’ маҳаллаларида қад ростлайди”, — деди Деҳқонобод тумани ҳокими Зоир Алиқулов.
