“Ташаббусли бюджет”да ботлар орқали овоз йиғиш мумкинми? Мутахассис жавоб берди

Ижтимоий тармоқларда “Open budget” порталидаги лойиҳаларга овоз бериш жараёнида “накруткадан” фойдаланилаётгани ҳақида хабарлар тарқалди. “Дарё” мухбири Молия вазирлиги билан боғланиб, ҳолат юзасидан изоҳ олди.

Вазирлик матбуот хизмати раҳбари Сарвиноз Аҳмедованинг маълум қилишича, порталда сунъий йўл билан овоз тўплашнинг иложи йўқ, ҳар бир овознинг қайси рақамдан, қачон берилгани, қандай SMS юборилгани доимий ёзиб борилади.

Бундан ташқари, текширув мақсадида кўп овоз тўплаётган ташаббусларга овоз берганларнинг телефон рақамларига қўнғироқ қилиб кўрилганда, улар ўз розилиги билан танлов қилганини айтган.

“Ҳозирча ҳеч қандай ноқонуний ҳаракатни учратмадик. Тизим ахборот хавфсизлиги текширувидан ўтказилган, муаммо кузатилмаган. Агар дастурчилар бундай ҳолатга йўл қўйса, вазифасини суистеъмол қилганликда айбланади. Ҳамма нарсанинг ўз ълоглариъ бор”, — дейди вазирлик мутахассиси.

Шунингдек, фуқаролар овоз бериш жараёнида бевосита зарур бўлган SMS-хабарномалар Beeline алоқа операторига тегишли абонентларнинг телефон рақамига етиб келмаётганидан шикоят қилмоқда. Сарвиноз Аҳмедова бу ҳолат “мобил провайдерлар билан кузатилаётган муаммо” сабаб юз бераётганини маълум қилди.