Навоий вилоятида ер майдонини ноқонуний сотиш билан боғлиқ фирибгарлик ҳолатининг олди олинди. Бу ҳақда Бош прокуратура ҳузуридаги департамент хабар берди.
Қайд этилишича, Бош прокуратура ҳузуридаги департамент, ДХХ ва ИИВнинг Навоий вилояти бошқармалари томонидан тезкор тадбир ўтказилган. Тадбир давомида Нурота туманида яшовчи Н.Т. исмли фуқаро “Ж.Б.” фермер хўжалиги раҳбари Й.Н. билан ўзаро тил бириктириб, хўжаликнинг 80 гектар ер майдонини фирибгарлик йўли билан фуқаро М.Х.га 1 миллиард сўмга сотишга келишгани аниқланган. Улар олдиндан 700 миллион сўмни олган вақтларида ашёвий далиллар билан ушланган.
Шу каби, департаментнинг Навоий вилоят бошқармаси томонидан ИИБ ходимлари билан ҳамкорликда ўтказилган яна бир тезкор тадбирда Нурота туманида яшовчи З.Х. “М.Б.” оилавий корхонаси раҳбари Б.М. билан ўзаро тил бириктиргани аниқланган. Улар ушбу корхонага қарашли ер майдони билан бирга давлат захирасидан яна 16 гектар, жами 32 гектар ер майдонини фуқаро Т.К.га 30 минг долларга сотишга келишиб, олдиндан 15 минг долларни олган вақтларида ашёвий далиллар билан ушланган.
Шунингдек, Избоскан туманида ўтказилган тезкор тадбирда фуқаро А.У. “У.М.” боғдорчилик фермер хўжалигига қарашли 0,10 гектар ер майдонини гўёки юқори лавозимда ишловчи танишлари ёрдамида фуқаро А.Б.га расмийлаштириб олиб бериши эвазига 15 минг долларни олган вақтида ашёвий далиллар билан ушланган.
Департаментнинг Жомбой туман бўлими томонидан, ДХХ ва ИИБ ходимлари билан ҳамкорликда ўтказилган тезкор тадбирда эса фуқаро Л.Ж. фуқаро Б.К.нинг ишончига кириб, унга Тойлоқ тумани ҳудудидаги 0,13 гектар суғориладиган ер майдонини 13 минг долларга сотишга келишиб, шундан 10,5 минг долларни олган вақтида ашёвий далиллар билан қўлга олинган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28,211-моддаси (пора бериш) билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)