Криштиану Роналду терма жамоалар миқёсида иккита тарихий рекорд қайд этди

Португалия терма жамоаси ҳужумчиси Криштиану Роналду Евро—2024 саралаши доирасида кечган Лихтенштейнга қарши ўйинда (4:0) дубль муаллифига айланди.

Бу 38 ёшли футболчи учун миллий терма жамоа сафидаги 197-ўйин бўлди. Роналду бу борада Кувайт вакили Бадир ал-Мутванинг рекордини янгилаб, терма жамоа сафида энг кўп ўйин ўтказган футболчига айланди.

Қайд этиш керак, Халқаро футбол тарихи ва статистикаси федерацияси (IFFHS) бу кўрсаткич бўйича малайзиялик Сон Чин Анни рўйхат етакчиси деб ҳисоблайди (219 ўйин). У расмий ҳисобланмаган 24 та ўйинда иштирок этган.

Роналду Португалия сафидаги голлари сонини 120 тага етказиб олган ҳолда ўзига тегишли рекордни мустаҳкамлади. Шунингдек, бу Криштиану учун расмий ўйинларда урилган 100-гол бўлди. Роналду бу натижани қайд этган тарихдаги илк футболчи бўлди.

Лихтенштейн Роналду тўп киритган 47-терма жамоага айланди. Португалиялик футболчи терма жамоалар миқёсидаги расмий ўйинда илк бор 2004 йили Греция дарвозасини ишғол қилганди. Ҳужумчи терма жамоада кетма-кет 20 йил давомида (2004 йилдан бери) ҳар йили гол уриб келмоқда.

Роналду қаторасига иккинчи ўйинда жарима зарбасидан гол урди. Аввалроқ у “Ан-Насср” сафида жарима зарбасини муваффақиятли амалга оширганди. Қайд этиш керак, Криштиану бундан аввал охирги марта 2022 йилнинг апрелида жаримадан тўп киритганди.